hum to shair hain hum sach nahin bolte

ham to shā.ir haiñ ham sach nahīñ bolte

jān-e-jāñ sach pe kyoñ itnā isrār hai

sach kī azmat se kab ham ko inkār hai

ham bhī shā.ir haiñ āḳhir usī qaum ke

jis kā har fard bikne pe tayyār hai

ham haiñ lafzoñ ke tājir ye bāzār hai

sach to ye hai guzarte hue vaqt se

fā.eda jo uThā le vo fankār hai

ham na suqrāt haiñ ham na mansūr haiñ

ham se sach kī tavaqqo.a hī be-kār hai

tez talvār sī vaqt kī dhaar hai

is liye jān-e-jāñ apnī tahrīr se

ḳhauf-e-ta.azīr se

sachche motī kabhī ham nahīñ rolte

ham to shā.ir haiñ ham sach nahīñ bolte

fasl aatī hai jab hifz-e-pindār kī

sach ke iz.hār kī

ham haqā.eq se nazreñ churā.e hue

maslahat ke janāze uThā.e hue

sar jhukā.e hue

lauT jaate haiñ maazī ke sahrāoñ meñ

baiTh kar phir ġham-e-zāt kī chhāñv meñ

sochte bhī nahīñ bolte bhī nahīñ

sahme sahme hue log milte hoñ jab

har taraf zaḳhm ke phuul khilte hoñ jab

jān-e-jāñ kam se kam aise mausam meñ ham

harf-e-haq to kujā lab nahīñ kholte

ham to shā.ir haiñ ham sach nahīñ bolte

hum to shair hain hum sach nahin bolte

jaan-e-jaan sach pe kyon itna israr hai

sach ki azmat se kab hum ko inkar hai

hum bhi shair hain aaKHir usi qaum ke

jis ka har fard bikne pe tayyar hai

hum hain lafzon ke tajir ye bazar hai

sach to ye hai guzarte hue waqt se

faeda jo uTha le wo fankar hai

hum na suqraat hain hum na mansur hain

hum se sach ki tawaqqoa hi be-kar hai

tez talwar si waqt ki dhaar hai

is liye jaan-e-jaan apni tahrir se

KHauf-e-tazir se

sachche moti kabhi hum nahin rolte

hum to shair hain hum sach nahin bolte

fasl aati hai jab hifz-e-pindar ki

sach ke izhaar ki

hum haqaeq se nazren churae hue

maslahat ke janaze uThae hue

sar jhukae hue

lauT jate hain mazi ke sahraon mein

baiTh kar phir gham-e-zat ki chhanw mein

sochte bhi nahin bolte bhi nahin

sahme sahme hue log milte hon jab

har taraf zaKHm ke phul khilte hon jab

jaan-e-jaan kam se kam aise mausam mein hum

harf-e-haq to kuja lab nahin kholte

hum to shair hain hum sach nahin bolte