ham-zad

barq-pā lamhoñ kī ik zanjīr meñ jakḌā huā

vo shikasta-pā unhī rastoñ se guzrā

aur nādīda ḳhudāoñ kā hujūm

ḳhanda-zan āñkhoñ se us kī nā-rasā.ī kā tamāshā dekh

kar kahtā rahā

tū ne chāhā thā magar tere muqaddar meñ na thā

jaise us kī bebasī meñ vo kabhī shāmil na the

vo kahāñ gum ho gayā

koī naqsh-e-pā nahīñ jis kī zabāñ

ek harf-e-nā-shunīda hī kahe

aur maiñ din-rāt ke sahrā meñ

us ko DhūñDh kar paane kī koī aarzū le chalūñ

rāstoñ par koī naqsh-e-pā nahīñ

koī nishāñ baaqī nahīñ

naqsh gar lamhoñ kī har tahrīr

dast-e-be-nishāñ ke lams qātil kā fasāna ban ga.ī

shahr ke logoñ

tumhāre rauzan-e-chāk-e-jigar bhī band haiñ

tum meñ har ik ne kisī ḳhisht-e-tamannā

sañg-e-nafrat se

ye chashm-e-rauzan-e-dil band kar ke

āḳhirī ummīd kā sūraj bujhā kar rakh diyā

aur ab lazzāt kī duniyā meñ gum

sūd-o-saudā kī asīrī par

razā-mand kā tauq-e-be-nishāñ pahne hue

ḳhush ho ki jannat mil ga.ī

maiñ akelā

tañg rāhoñ sañg-dil saḌkoñ pe

us ko DhūñDne kaise chalūñ

koī naqsh-e-pā nahīñ miltā mujhe

aur saarā shahr ye goyā daraḳhtoñ kā bharā jañgal

faqat shor-e-abas kā silsila hai

koī harf-e-nā-shunīda se nahīñ vāqif yahāñ

lahza lahz tīra-tar hotī huī ye shaam bhī

raat ke qulzum meñ gir kar be-nishāñ ho jā.egī

aur ik mauj-e-fanā is raat se tārīk-tar

is bhare jañgal chamakte shahr par chhā jā.egī

ek maiñ huuñ rāhat ḳhvāb-e-shabīna

merī qismat meñ nahīñ

dopahar kī dhuup

shab kī tīrgī

merā muqaddar ban ga.ī

raat ko phir

sa.i-e-lā-hāsil kā zaḳhm lā-davā

un siyah-rastoñ pe us kī justujū karne mujhe le aa.egā

ūñghī saḌkoñ pe apnī chaap sun kar

phir mire dil kā vahī zaḳhm-e-kuhan

sad-zabān ho jā.egā

kaun merī dāstāñ sun le ki maiñ

us ko paane kī tamannā ke tufail

is bhare jañgal meñ tanhā huuñ

koī bhī rāz-dāñ merā nahīñ

dopahar kī dhuup meñ

us ne kyuuñ yuuñ muzmahil nazroñ se dekhā thā mujhe

us kī āñkhoñ meñ sisaktī ruuh

kyuuñ mere liye chāk-e-jigar ban kar rahī

kaash ye chāk-e-jigar chāk-e-garebāñ ban sake

taaki merī sa.i-e-lā-hāsil kā zaḳhm lā-davā

lazzat āvārgī kā ta.ana-e-qātil na bin jaa.e kahīñ

shahr vaale ḳhush haiñ

chashm-e-rauzan-e-dil ab kisī ḳhisht-e-tamannā

tūda-e-ummīd sañg-e-ārzū se band hai

ek maiñ huuñ merā chāk-e-dil

kisī sozan se siltā hī nahīñ

ye kisī sañg-e-tamannā tūda-e-ummīd se bhartā nahīñ

aur jis kī justujū meñ rāt-din

barg-e-āvāra banā phirtā huuñ maiñ

us kā naqsh-e-pā kahīñ miltā nahīñ

us kā naqsh-e-pā kahīñ miltā nahīñ

barq-pa lamhon ki ek zanjir mein jakDa hua

wo shikasta-pa unhi raston se guzra

aur nadida KHudaon ka hujum

KHanda-zan aankhon se us ki na-rasai ka tamasha dekh

kar kahta raha

tu ne chaha tha magar tere muqaddar mein na tha

jaise us ki bebasi mein wo kabhi shamil na the

wo kahan gum ho gaya

koi naqsh-e-pa nahin jis ki zaban

ek harf-e-na-shunida hi kahe

aur main din-raat ke sahra mein

us ko DhunDh kar pane ki koi aarzu le chalun

raston par koi naqsh-e-pa nahin

koi nishan baqi nahin

naqsh gar lamhon ki har tahrir

dast-e-be-nishan ke lams qatil ka fasana ban gai

shahr ke logon

tumhaare rauzan-e-chaak-e-jigar bhi band hain

tum mein har ek ne kisi KHisht-e-tamanna

sang-e-nafrat se

ye chashm-e-rauzan-e-dil band kar ke

aaKHiri ummid ka suraj bujha kar rakh diya

aur ab lazzat ki duniya mein gum

sud-o-sauda ki asiri par

raza-mand ka tauq-e-be-nishan pahne hue

KHush ho ki jannat mil gai

main akela

tang rahon sang-dil saDkon pe

us ko DhunDne kaise chalun

koi naqsh-e-pa nahin milta mujhe

aur sara shahr ye goya daraKHton ka bhara jangal

faqat shor-e-abas ka silsila hai

koi harf-e-na-shunida se nahin waqif yahan

lahza lahz tira-tar hoti hui ye sham bhi

raat ke qulzum mein gir kar be-nishan ho jaegi

aur ek mauj-e-fana is raat se tarik-tar

is bhare jangal chamakte shahr par chha jaegi

ek main hun rahat KHwab-e-shabina

meri qismat mein nahin

dopahar ki dhup

shab ki tirgi

mera muqaddar ban gai

raat ko phir

sai-e-la-hasil ka zaKHm la-dawa

un siyah-raston pe us ki justuju karne mujhe le aaega

unghi saDkon pe apni chap sun kar

phir mere dil ka wahi zaKHm-e-kuhan

sad-zaban ho jaega

kaun meri dastan sun le ki main

us ko pane ki tamanna ke tufail

is bhare jangal mein tanha hun

koi bhi raaz-dan mera nahin

dopahar ki dhup mein

us ne kyun yun muzmahil nazron se dekha tha mujhe

us ki aankhon mein sisakti ruh

kyun mere liye chaak-e-jigar ban kar rahi

kash ye chaak-e-jigar chaak-e-gareban ban sake

taki meri sai-e-la-hasil ka zaKHm la-dawa

lazzat aawargi ka tana-e-qatil na bin jae kahin

shahr wale KHush hain

chashm-e-rauzan-e-dil ab kisi KHisht-e-tamanna

tuda-e-ummid sang-e-arzu se band hai

ek main hun mera chaak-e-dil

kisi sozan se silta hi nahin

ye kisi sang-e-tamanna tuda-e-ummid se bharta nahin

aur jis ki justuju mein raat-din

barg-e-awara bana phirta hun main

us ka naqsh-e-pa kahin milta nahin

us ka naqsh-e-pa kahin milta nahin