ham-zad

kuchh kiyā jaa.e na sochā jaa.e

muḌ ke dekhūñ to na dekhā jaa.e

merī tanhā.ī kī vahshat se hirāsāñ ho kar

merā saaya mere qadmoñ meñ simaT aayā hai

kaun hai phir jo mire saath chalā aatā hai

merā saaya to nahīñ!!

kis kī aahaT kā gumāñ

yuuñ mire paañv kī zanjīr banā jaatā hai

duur tā-hadd-e-nazar shahr ke āsār nahīñ

aur dushman kī tarah

shaam talvār liye sar pe chalī aatī hai

boltā huuñ to āchānak koī

merī āvāz meñ āvāz milā detā hai

mujh ko ḳhud mere hī lafzoñ se Darā detā hai

kaun hai jis ne mire qalb kī dhaḌkan dhaḌkan

apne ehsās kī suulī pe chaḌhā rakkhī hai

merī raftār ke pur-ḳhauf-o-ḳhatar raste meñ

kis ne āvāz kī dīvār banā rakkhī hai

sañg-e-āvāz kī dīvār girā.ūñ kaise

kuchh kiyā jaa.e na sochā jaa.e

muḌ ke dekhūñ to na dekhā jaa.e

kuchh kiya jae na socha jae

muD ke dekhun to na dekha jae

meri tanhai ki wahshat se hirasan ho kar

mera saya mere qadmon mein simaT aaya hai

kaun hai phir jo mere sath chala aata hai

mera saya to nahin!!

kis ki aahaT ka guman

yun mere panw ki zanjir bana jata hai

dur ta-hadd-e-nazar shahr ke aasar nahin

aur dushman ki tarah

sham talwar liye sar pe chali aati hai

bolta hun to aachanak koi

meri aawaz mein aawaz mila deta hai

mujh ko KHud mere hi lafzon se Dara deta hai

kaun hai jis ne mere qalb ki dhaDkan dhaDkan

apne ehsas ki suli pe chaDha rakkhi hai

meri raftar ke pur-KHauf-o-KHatar raste mein

kis ne aawaz ki diwar bana rakkhi hai

sang-e-awaz ki diwar giraun kaise

kuchh kiya jae na socha jae

muD ke dekhun to na dekha jae