hamara punjab

tahzīb kā rahbar hai ye punjab hamārā

har ilm kā masdar hai ye punjab hamārā

har fan meñ muaqqar hai ye punjab hamārā

irfāñ se munavvar hai ye punjab hamārā

jannat se bhī bartar hai ye punjab hamārā

sāhir bhī fusūñ-kār bhī haiñ is kī bahāreñ

sarmast bhī sarshār bhī haiñ is kī bahāreñ

dilkash bhī tarah-dār bhī haiñ is kī bahāreñ

gul-rañg bhī gul-bār bhī haiñ is kī bahāreñ

jannat se bhī bartar hai ye punjab hamārā

ye ḳhuld-fazā ḳhuld-numā is ke manāzir

ye māh-e-ziyā mehr-laqā is ke manāzir

ye kaif-e-adā rūh-fazā is ke manāzir

har samt ye andoh-rubā is ke manāzir

jannat se bhī bartar hai ye punjab hamārā

mai-bār bhī mai-nosh bhī haiñ is kī ghaTā.eñ

jām-e-mai-e-sar-josh bhī haiñ is kī ghaTā.eñ

mai-ḳhāna-ba-āġhosh bhī haiñ is kī ghaTā.eñ

ġhārat-gar-e-sad-hosh bhī haiñ is kī ghaTā.eñ

jannat se bhī bartar hai ye punjab hamārā

rishiyoñ ne yahāñ gaa.e haiñ ulfat ke tarāne

gurūoñ ne sunā.e haiñ haqīqat ke fasāne

bhagtoñ ne yahāñ paa.e haiñ qudrat ke ḳhazāne

logoñ ne banā.e haiñ masarrat ke Thikāne

jannat se bhī bartar hai ye punjab hamārā

punjab ko ham rausahn-o-pur-nūr kareñge

punjab ko ham amn se māmūr kareñge

punjab ko har haal meñ masrūr kareñge

punjab ko ham aur bhī mash.hūr kareñge

jannat se bhī bartar hai ye punjab hamārā

tahzib ka rahbar hai ye punjab hamara

har ilm ka masdar hai ye punjab hamara

har fan mein muaqqar hai ye punjab hamara

irfan se munawwar hai ye punjab hamara

jannat se bhi bartar hai ye punjab hamara

sahir bhi fusun-kar bhi hain is ki bahaaren

sarmast bhi sarshaar bhi hain is ki bahaaren

dilkash bhi tarah-dar bhi hain is ki bahaaren

gul-rang bhi gul-bar bhi hain is ki bahaaren

jannat se bhi bartar hai ye punjab hamara

ye KHuld-faza KHuld-numa is ke manazir

ye mah-e-ziya mehr-laqa is ke manazir

ye kaif-e-ada ruh-faza is ke manazir

har samt ye andoh-ruba is ke manazir

jannat se bhi bartar hai ye punjab hamara

mai-bar bhi mai-nosh bhi hain is ki ghaTaen

jam-e-mai-e-sar-josh bhi hain is ki ghaTaen

mai-KHana-ba-aghosh bhi hain is ki ghaTaen

ghaarat-gar-e-sad-hosh bhi hain is ki ghaTaen

jannat se bhi bartar hai ye punjab hamara

rishiyon ne yahan gae hain ulfat ke tarane

guruon ne sunae hain haqiqat ke fasane

bhagton ne yahan pae hain qudrat ke KHazane

logon ne banae hain masarrat ke Thikane

jannat se bhi bartar hai ye punjab hamara

punjab ko hum rausahn-o-pur-nur karenge

punjab ko hum amn se mamur karenge

punjab ko har haal mein masrur karenge

punjab ko hum aur bhi mashhur karenge

jannat se bhi bartar hai ye punjab hamara