hamari KHwahishat hamari zaruriyat ki paidawar hain

hamārī ḳhvāhishāt hamārī zarūriyāt kī paidāvār haiñ

ḳhvāhishāt kī takmīl ḳhushī detī hai

aur adam-e-takmīl ranj

ḳhushī aur ranj kyā hai

hamāre apne mizāj kī jam.a-tafrīq

kyā tum ne kabhī kisī ke liye maut kī ḳhvāhish kī hai

maut meñ ek ḳhushī poshīda hai

ek svārth nihit hai

tumhārī zindagī svārth pe qaa.em hai

tum jab bhī maut chāhoge apne svārth ke liye chāhoge

yuuñ koī maut ko gale lagātā hai

maiñ sochtā huuñ

zindagī kī sāñsoñ ne

mere badan ko hiddat ke sivā kyā diyā hai

dhartī par ek bojh se ziyāda nahīñ rahā hai merā vajūd

āḳhir dhartī kab tak merā bojh bardāsht karegī

vaqt aa gayā hai ki maut mujhe gale lagā le

maiñ dhartī kā bojh kam karnā chāhtā huuñ

yā zindagī ke bojh se ḳhud chhuTkārā hāsil karnā chāhtā huuñ

maiñ jāntā huuñ

merī maut se sansār apnī raftār dhīmī nahīñ kar legā

vaqt Thahar nahīñ jā.egā

ki maiñ kisī ke liye zinda nahīñ thā

aur merī maut bhī

apne liye hai

ḳhālis apne liye

hamari KHwahishat hamari zaruriyat ki paidawar hain

KHwahishat ki takmil KHushi deti hai

aur adam-e-takmil ranj

KHushi aur ranj kya hai

hamare apne mizaj ki jama-tafriq

kya tum ne kabhi kisi ke liye maut ki KHwahish ki hai

maut mein ek KHushi poshida hai

ek swarth nihit hai

tumhaari zindagi swarth pe qaem hai

tum jab bhi maut chahoge apne swarth ke liye chahoge

yun koi maut ko gale lagata hai

main sochta hun

zindagi ki sanson ne

mere badan ko hiddat ke siwa kya diya hai

dharti par ek bojh se ziyaada nahin raha hai mera wajud

aaKHir dharti kab tak mera bojh bardasht karegi

waqt aa gaya hai ki maut mujhe gale laga le

main dharti ka bojh kam karna chahta hun

ya zindagi ke bojh se KHud chhuTkara hasil karna chahta hun

main jaanta hun

meri maut se sansar apni raftar dhimi nahin kar lega

waqt Thahar nahin jaega

ki main kisi ke liye zinda nahin tha

aur meri maut bhi

apne liye hai

KHalis apne liye