hamari ruh ka naghma kahan hai?

vo dard-e-ārzū

jo larza-bar-andām thā pahnā.e aalam meñ

vo harf-e-tishnagī

jo naġhma-bar-lab thā dabistān-e-shab-e-ġham meñ

vo ik duniyā-e-nā-paidā-karāañ thī

āsmāñ kī vus.ateñ jis meñ samā.ī thiiñ

baḌe gahre samundar maujzan the kurra-e-dil meñ

jinheñ ik justajū-e-ḳhām ne ḳhāmosh kar Daalā

bahut muñh zor maujeñ thiiñ

jinheñ ḳhud ham ne pāband-e-salāsil kar diyā ik din

farāz-e-koh se aate hue betāb dariyā the

jinheñ ik dā.ere meñ raqs karnā ham ne sikhlāyā

taqāze hosh-mandī ke hamāre rāhbar nikle

farāze-e-ārzū se ham

nasheb-e-āfiyat meñ aan nikle

aur ma.āl-e-roz-o-shab ke besh o kam meñ gum hue

apnī matta-e-ḳhud-nigāhī chhoḌ aa.e

ik sukūt-e-āhnī hamrāh le aa.e

mudāvā-e-alam koī nahīñ

bazm-e-nashāt o dard-e-ġham koī nahīñ

ik hū kā aalam hai

khaḌe haiñ sāhil-e-hastī pe ham

jiine ke be-pāyāñ bahāne chhoḌ aa.e

ik sukūt-e-āhnī hamrāh le aa.e

hamārī yaad ke kashkol ḳhālī haiñ

hamārī ruuh kā naġhma kahāñ hai?

wo dard-e-arzu

jo larza-bar-andam tha pahnae aalam mein

wo harf-e-tishnagi

jo naghma-bar-lab tha dabistan-e-shab-e-gham mein

wo ek duniya-e-na-paida-karaan thi

aasman ki wusaten jis mein samai thin

baDe gahre samundar maujzan the kurra-e-dil mein

jinhen ek justaju-e-KHam ne KHamosh kar Dala

bahut munh zor maujen thin

jinhen KHud hum ne paband-e-salasil kar diya ek din

faraaz-e-koh se aate hue betab dariya the

jinhen ek daere mein raqs karna hum ne sikhlaya

taqaze hosh-mandi ke hamare rahbar nikle

faraaze-e-arzu se hum

nasheb-e-afiyat mein aan nikle

aur maal-e-roz-o-shab ke besh o kam mein gum hue

apni matta-e-KHud-nigahi chhoD aae

ek sukut-e-ahni hamrah le aae

mudawa-e-alam koi nahin

bazm-e-nashat o dard-e-gham koi nahin

ek hu ka aalam hai

khaDe hain sahil-e-hasti pe hum

jine ke be-payan bahane chhoD aae

ek sukut-e-ahni hamrah le aae

hamari yaad ke kashkol KHali hain

hamari ruh ka naghma kahan hai?