hamari zaban

urdu kaho yā hindostānī

is kī baḌā.ī duniyā ne maanī

aapas kī millat maqsūd is kā

ulfat kī ḳhūgar vahdat kī baanī

guzre huoñ ke dil kī dulārī

biite dinoñ kī dilkash kahānī

hai ittihād-e-qaumī kā naġhma

āġhāz is kā us kī javānī

ahl-e-vatan the aapas meñ yak dil

is baat kī hai urdu nishānī

hone ko haiñ go sad.hā zabāneñ

par is ke aage bhartī haiñ paanī

uttar se dakshin pūrab se pachchhim

har samt is kī hai hukmarānī

hindū bhī shaidā muslim bhī shaidā

hai saarī ḳhilqat is par divānī

hoñ kyuuñ na is ke sab log haamī

hai ye sarāsar hindostānī

miltī hai khul kar har ik zabāñ se

is baat meñ hai kaun is kā saanī

tarz-e-nigārish gar dekh paa.eñ

rah jaa.eñ hairāñ bahzād-o-mānī

is kī fasāhat is kī balāġhat

is kī salāsat is kī ravānī

rañgīn qisse novel anokhe

dilchasp nazmeñ shīrīñ-zabānī

jādū-nigārī shevā-bayānī

san.at-tarāzī gauhar-fishānī

har bol is kā misrī sā mīThā

har baat dilkash har lai suhānī

merī duā hai ye mudda.ā hai

is par ḳhudā kī ho mehrbānī

'nayyar' jahāñ meñ phūle-phale ye

jab tak hai baaqī duniyā-e-fānī

urdu kaho ya hindostani

is ki baDai duniya ne mani

aapas ki millat maqsud is ka

ulfat ki KHugar wahdat ki bani

guzre huon ke dil ki dulari

bite dinon ki dilkash kahani

hai ittihad-e-qaumi ka naghma

aaghaz is ka us ki jawani

ahl-e-watan the aapas mein yak dil

is baat ki hai urdu nishani

hone ko hain go sadha zabanen

par is ke aage bharti hain pani

uttar se dakshin purab se pachchhim

har samt is ki hai hukmarani

hindu bhi shaida muslim bhi shaida

hai sari KHilqat is par diwani

hon kyun na is ke sab log hami

hai ye sarasar hindostani

milti hai khul kar har ek zaban se

is baat mein hai kaun is ka sani

tarz-e-nigarish gar dekh paen

rah jaen hairan bahzad-o-mani

is ki fasahat is ki balaghat

is ki salasat is ki rawani

rangin qisse nowel anokhe

dilchasp nazmen shirin-zabani

jadu-nigari shewa-bayani

sanat-taraazi gauhar-fishani

har bol is ka misri sa miTha

har baat dilkash har lai suhani

meri dua hai ye muddaa hai

is par KHuda ki ho mehrbani

'nayyar' jahan mein phule-phale ye

jab tak hai baqi duniya-e-fani