hamd gati hai zamin

mālik-e-arz-o-samā ko yaad kartā hai jahāñ

hamd gaatī hai zamīñ tasbīh paḌhtā āsmāñ

haath bāñdhe peḌ saare jangaloñ meñ haiñ khaḌe

sab maveshī us kī azmat meñ rukū karte hue

jānvar sab reñgte sajde meñ haiñ goyā paḌe

zarra zarra is zamīñ kā rab kā hai tasbīh-ḳhvāñ

yaad kartā hai ḳhudā ko har ghaḌī saarā jahāñ

ye zamīñ allāh kī hamd-o-sanā meñ hai magan

us kī paakī ko bayāñ kartā huā niilā gagan

azmat-e-rab ke qasīda-ḳhvāñ haiñ ye koh-o-daman

ik usī ke naam se raushan hue kaun-o-makāñ

yaad kartā hai ḳhudā ko har ghaḌī saarā jahāñ

us kī azmat ke shavāhid chaar jānib haiñ ayaañ

hai har ik zarre ke dil meñ mālik-e-mulk-e-jahāñ

kyoñ magar insān apne rab se ġhāfil hai yahāñ

mālik-e-arz-o-samā ko yaad kartā hai jahāñ

hamd gaatī hai zamīñ tasbīh paḌhtā āsmāñ

malik-e-arz-o-sama ko yaad karta hai jahan

hamd gati hai zamin tasbih paDhta aasman

hath bandhe peD sare jangalon mein hain khaDe

sab maweshi us ki azmat mein ruku karte hue

jaanwar sab rengte sajde mein hain goya paDe

zarra zarra is zamin ka rab ka hai tasbih-KHwan

yaad karta hai KHuda ko har ghaDi sara jahan

ye zamin allah ki hamd-o-sana mein hai magan

us ki paki ko bayan karta hua nila gagan

azmat-e-rab ke qasida-KHwan hain ye koh-o-daman

ek usi ke nam se raushan hue kaun-o-makan

yaad karta hai KHuda ko har ghaDi sara jahan

us ki azmat ke shawahid chaar jaanib hain ayan

hai har ek zarre ke dil mein malik-e-mulk-e-jahan

kyon magar insan apne rab se ghafil hai yahan

malik-e-arz-o-sama ko yaad karta hai jahan

hamd gati hai zamin tasbih paDhta aasman