hamein nabud mat karna

agarche suut se takle ne dhāge ko na khīñchā thā

mire reshe bunat ke marhale meñ the

rageñ maañ kī durīdoñ se na bichhḌī thiiñ

maiñ apne jism se kuchh fāsle par thā

magar mere aqīde kā ta.ayyun karne vāloñ ne

mire maslak ke baare meñ

jo sochā thā use tajsīm kar Daalā

maiñ jis dam apne hone par utar aayā

mujhe taqsīm kar Daalā

kisī ne mere māthe par tilak dāġhā

salīboñ ko mirī chhātī pe khīñchā

aur kānoñ meñ azaañ bhar dī

phir is ke ba.ad

peshānī pe añgāre

salībeñ apne siine par

samā.at par namīda zañg ke taale sambhāle

maiñ ne saarī umr

duniyā ke tasarruf meñ guzārī hai

mirī fitrat simaTnā aur

qismat TuuT jaanā hai

maiñ paara huuñ

mujhe duniyā masaltī hai

nafī isbāt kī zarbeñ

mujhe taqsīm kartī haiñ

bikhartā huuñ

mire zarre thirakte haiñ

to kahte haiñ

hameñ nābūd mat karnā

ki jab taqsīm hone kā amal mumkin nahīñ rahtā

to phir zarra

zarā bhar choT khāne par

dhamāke ko ugaltā hai

dhamāke ko samajhte ho

dhamāka jis se harf-e-kun Tapaktā hai

hameñ nābūd mat karnā

agarche sut se takle ne dhage ko na khincha tha

mere reshe bunat ke marhale mein the

ragen man ki duridon se na bichhDi thin

main apne jism se kuchh fasle par tha

magar mere aqide ka tayyun karne walon ne

mere maslak ke bare mein

jo socha tha use tajsim kar Dala

main jis dam apne hone par utar aaya

mujhe taqsim kar Dala

kisi ne mere mathe par tilak dagha

salibon ko meri chhati pe khincha

aur kanon mein azan bhar di

phir is ke baad

peshani pe angare

saliben apne sine par

samaat par namida zang ke tale sambhaale

main ne sari umr

duniya ke tasarruf mein guzari hai

meri fitrat simaTna aur

qismat TuT jaana hai

main para hun

mujhe duniya masalti hai

nafi isbaat ki zarben

mujhe taqsim karti hain

bikharta hun

mere zarre thirakte hain

to kahte hain

hamein nabud mat karna

ki jab taqsim hone ka amal mumkin nahin rahta

to phir zarra

zara bhar choT khane par

dhamake ko ugalta hai

dhamake ko samajhte ho

dhamaka jis se harf-e-kun Tapakta hai

hamein nabud mat karna