hamesha tishnagi ko zeb-e-tan rakha

tumheñ ham ne batāyā thā

tamannā ke subuk qadmoñ se raste tai nahīñ hote

magar tum ko hamārī baat par īmān hī kab thā

hamīñ the

jo tumhārī an-kahī bātoñ kā bhī idrāk rakhte the

ye ham the

jo tumhāre lafz kī hurmat ko

dil kī rehl meñ rakh kar

duā-e-nīm-shab ke saath paḌhte the

magar shāyad hamārī sab munājāteñ

tumhāre dil kī be-rauzan samā.at tak nahīñ pahuñchīñ

phir aisā thā

tumhāre paas jitne zaḳhm the

sab ham ko de Daale

ye zaḳhmoñ kī qabā bhī ḳhuub thī

jab tumhārī yaad ke jhoñke

use chhū kar guzarte the

to ye tan se chipaktī thī

magar ham ne kabhī zaḳhmoñ pe marham tak nahīñ rakhā

hamārī aarzū ne to

hamesha tishnagī ko zeb-e-tan rakkhā

tumhein hum ne bataya tha

tamanna ke subuk qadmon se raste tai nahin hote

magar tum ko hamari baat par iman hi kab tha

hamin the

jo tumhaari an-kahi baaton ka bhi idrak rakhte the

ye hum the

jo tumhaare lafz ki hurmat ko

dil ki rehl mein rakh kar

dua-e-nim-shab ke sath paDhte the

magar shayad hamari sab munajaten

tumhaare dil ki be-rauzan samaat tak nahin pahunchin

phir aisa tha

tumhaare pas jitne zaKHm the

sab hum ko de Dale

ye zaKHmon ki qaba bhi KHub thi

jab tumhaari yaad ke jhonke

use chhu kar guzarte the

to ye tan se chipakti thi

magar hum ne kabhi zaKHmon pe marham tak nahin rakha

hamari aarzu ne to

hamesha tishnagi ko zeb-e-tan rakkha