hansti hui laDki

hañstī huī laḌkī

ek aañsū meñ rahtī hai

is ek aañsū meñ

jab vo chhup ga.ī thī

to use kisī ne nahīñ DhūñDā

aur is ek aañsū meñ

jab vo ghar ga.ī thī

to kisī ko nahīñ mil sakī

isī aañsū meñ se

haath baḌhā ke

us ne phuul toḌe the

aur isī aañsū meñ se us ne

vo kitāb paḌhī thī

jis meñ āñsuoñ se

toḌe hue phuul nahīñ rakhe jā sakte

hañstī huī laḌkī

bārish meñ

is ek aañsū se

bāhar nahīñ jā saktī

vo chaltī hai

aur hamesha thak ke baiTh jaatī hai

apne kāḌhe hue rumāl par

vo suntī hai apnī kahī huī kahānī

aur har baar rone lagtī hai

hañstī huī laḌkī

apnī hathelī pe

āñsuoñ se

ek qil.a banā letī hai

aur ek aañsū se

ziyāda nahīñ rotī

hansti hui laDki

ek aansu mein rahti hai

is ek aansu mein

jab wo chhup gai thi

to use kisi ne nahin DhunDa

aur is ek aansu mein

jab wo ghar gai thi

to kisi ko nahin mil saki

isi aansu mein se

hath baDha ke

us ne phul toDe the

aur isi aansu mein se us ne

wo kitab paDhi thi

jis mein aansuon se

toDe hue phul nahin rakhe ja sakte

hansti hui laDki

barish mein

is ek aansu se

bahar nahin ja sakti

wo chalti hai

aur hamesha thak ke baiTh jati hai

apne kaDhe hue rumal par

wo sunti hai apni kahi hui kahani

aur har bar rone lagti hai

hansti hui laDki

apni hatheli pe

aansuon se

ek qila bana leti hai

aur ek aansu se

ziyaada nahin roti