har chehra ek kahani hai

har chehra ek kahānī hai

jab chehre paḌhnā sīkhoge

tab koī kahānī likkhoge

har chehre pe ik naqsha hai

is meñ raste hī raste haiñ

ye raste bhūl-bhulayyāñ haiñ

jab bhūl-bhulayyāñ bhaTkoge

tab koī kahānī likkhoge

har chehra ek samundar hai

har naqsh kī uThtī lahroñ meñ

jab paanī paanī utroge

tab koī kahānī likkhoge

har chehra ek imārat hai

do khiḌkī jaisī āñkhoñ meñ

kuchh duur khaḌī hairānī ko

jab hairānī se dekhoge

tab koī kahānī likkhoge

har chehra ik mahtāb bhī hai

aur ruup nagar kā ḳhvāb bhī hai

is ḳhvāb kā ek azaab suno

vo ruup nagar hai shīshe kā

jab kirchī kirchī bikhroge

tab koī kahānī likkhoge

har chehra ek nishāñ bhī hai

har chehra ek zabāñ bhī hai

jab us kī ramz ko jānoge

jab us kī bāteñ samjhoge

tab koī kahānī likkhoge

har chehra ek kahānī hai

jab chehre paḌhnā sīkhoge

tab koī kahānī likkhoge

āñkhoñ kī zabānī likkhoge

har chehra ek kahani hai

jab chehre paDhna sikhoge

tab koi kahani likkhoge

har chehre pe ek naqsha hai

is mein raste hi raste hain

ye raste bhul-bhulayyan hain

jab bhul-bhulayyan bhaTkoge

tab koi kahani likkhoge

har chehra ek samundar hai

har naqsh ki uThti lahron mein

jab pani pani utroge

tab koi kahani likkhoge

har chehra ek imarat hai

do khiDki jaisi aankhon mein

kuchh dur khaDi hairani ko

jab hairani se dekhoge

tab koi kahani likkhoge

har chehra ek mahtab bhi hai

aur rup nagar ka KHwab bhi hai

is KHwab ka ek azab suno

wo rup nagar hai shishe ka

jab kirchi kirchi bikhroge

tab koi kahani likkhoge

har chehra ek nishan bhi hai

har chehra ek zaban bhi hai

jab us ki ramz ko jaanoge

jab us ki baaten samjhoge

tab koi kahani likkhoge

har chehra ek kahani hai

jab chehre paDhna sikhoge

tab koi kahani likkhoge

aankhon ki zabani likkhoge