har jada-e-shahr

shahr kī ik ik saḌak

phāñktī aa.ī hai lākhoñ hādsoñ kī sard dhuul

jaane kitne ajnabī ik dūsre ke dost banñe se kināra kar ga.e

aur kitne āshnāoñ ke diloñ se miT ga.ī pahchān bhī

sau nigāheñ laakh zaḳhm

chār-samtī laakh jhuuT

sau tamāshoñ ke paḌe haiñ jā-ba-jā dhabbe

jinheñ

gard-e-masāfat meñ chhupāne ke liye

barq-pā lamhoñ ko thāme dauḌte jaate haiñ ham

lamhe do lamhe ko dam lene kī ḳhātir sust ho jaa.eñ agar

shahr kī ik ik saḌak

āñkhoñ se ḳhuuñ rulvā.egī

aur banā kar ham ko bhī ik dāstāñ

dohrā.e gī

hāñptī tahzīb ke ik ik musāfir se kahegī

dauḌte jaao yahī hai zindagī

mat ruko ik dūsre ke vāste

bhāgtā hai vaqt

lekin lamha lamha

dauḌnā hai sab ko

lekin tanhā tanhā

shahr ki ek ek saDak

phankti aai hai lakhon hadson ki sard dhul

jaane kitne ajnabi ek dusre ke dost banne se kinara kar gae

aur kitne aashnaon ke dilon se miT gai pahchan bhi

sau nigahen lakh zaKHm

chaar-samti lakh jhuT

sau tamashon ke paDe hain ja-ba-ja dhabbe

jinhen

gard-e-masafat mein chhupane ke liye

barq-pa lamhon ko thame dauDte jate hain hum

lamhe do lamhe ko dam lene ki KHatir sust ho jaen agar

shahr ki ek ek saDak

aankhon se KHun rulwaegi

aur bana kar hum ko bhi ek dastan

dohrae gi

hanpti tahzib ke ek ek musafir se kahegi

dauDte jao yahi hai zindagi

mat ruko ek dusre ke waste

bhagta hai waqt

lekin lamha lamha

dauDna hai sab ko

lekin tanha tanha