harf-e-aKHir

tumheñ ye fikr ki hai kaun vo gul-e-tāza

jo merī āḳhirī dhaḌkan kā harf-e-āḳhir hai

mujhe yaqīn ki ab tum ko kyā nahīñ ma.alūm

tumheñ pata hai ki hai kaun vo gul-e-tāza

ba-juz tumhāre kisī mere ġham kā andāza

jo naam barsoñ se hoñToñ pe raqs-farmā hai

vo naam chhīn na lo aaj mere hoñToñ se

jo baat dafn hai sadiyoñ se mere siine meñ

vo baat tum ko batāne se kuchh nahīñ hāsil

jo phuul palkoñ pe maiñ ne sajā.e rakkhe the

vo phuul auroñ ke dāman meñ kyoñ bikhar jaate

jo ḳhvāb āñkhoñ meñ maiñ ne chhupā.e rakkhe the

vo ḳhvāb mere haiñ mujh se kabhī na chhīno tum

maiñ jaisā kuchh bhī huuñ jis haal meñ huuñ jiine do

taḌapte karb ke aalam meñ zahr piine do

tumhein ye fikr ki hai kaun wo gul-e-taza

jo meri aaKHiri dhaDkan ka harf-e-aKHir hai

mujhe yaqin ki ab tum ko kya nahin malum

tumhein pata hai ki hai kaun wo gul-e-taza

ba-juz tumhaare kisi mere gham ka andaza

jo nam barson se honTon pe raqs-farma hai

wo nam chhin na lo aaj mere honTon se

jo baat dafn hai sadiyon se mere sine mein

wo baat tum ko batane se kuchh nahin hasil

jo phul palkon pe main ne sajae rakkhe the

wo phul auron ke daman mein kyon bikhar jate

jo KHwab aankhon mein main ne chhupae rakkhe the

wo KHwab mere hain mujh se kabhi na chhino tum

main jaisa kuchh bhi hun jis haal mein hun jine do

taDapte karb ke aalam mein zahr pine do