harf-e-arzu

ai mire ḳhvāboñ kī manzil ai mirī jān-e-vafā

tū ne mere dil pe jaane sehr sā kyā kar diyā

bhūltā huuñ jis qadar utnā hī yaad aatī hai tū

dhaḌkaneñ dil kī fuzūñ kuchh aur kar jaatī hai tū

tere andāz-e-takallum par fidā har saaz hai

chaal meñ abr-e-ḳhirāmāñ kā sā ik andāz hai

terī sāñsoñ kī mahak se dil pe chhātā hai ḳhumār

tū jo aa jaa.e to vīrāne meñ aa jaa.e bahār

terī āñkhoñ ke fusūñ se dil mirā mas.hūr hai

tere hoñToñ kā tabassum āb-shār-e-nūr hai

tū agar mil jaa.e to aa jaa.e is dil ko qarār

ḳhatm ho jaa.e mirī jāñ-soz shām-e-intizār

aaj terī yaad meñ dil be-tarah ġhamgīñ hai

tū na aa.ī to ye sachche pyaar kī tauhīn hai

ai mere KHwabon ki manzil ai meri jaan-e-wafa

tu ne mere dil pe jaane sehr sa kya kar diya

bhulta hun jis qadar utna hi yaad aati hai tu

dhaDkanen dil ki fuzun kuchh aur kar jati hai tu

tere andaz-e-takallum par fida har saz hai

chaal mein abr-e-KHiraman ka sa ek andaz hai

teri sanson ki mahak se dil pe chhata hai KHumar

tu jo aa jae to virane mein aa jae bahaar

teri aankhon ke fusun se dil mera mashur hai

tere honTon ka tabassum aab-shaar-e-nur hai

tu agar mil jae to aa jae is dil ko qarar

KHatm ho jae meri jaan-soz sham-e-intizar

aaj teri yaad mein dil be-tarah ghamgin hai

tu na aai to ye sachche pyar ki tauhin hai