harf-e-sadaqat

sāñsoñ kā vo pahlā lamha

ḳhvāboñ kī vo pahlī saa.at

narm havā ne jab merā ehsās chhuā thā

ḳhushbū ne jab lab khole the

karb-e-basīrat ne mere andar jhāñkā thā

harf-e-sadāqat ne mujh se sargoshī kī thī

ye saarī duniyā merī hai

aag havā miTTī aur paanī

sab par merā naam likhā hai

ūñchā parbat khulā āsmāñ phailī dhartī

dariyā jangal sahrā vaadī

rone hañsne kī āzādī

sab mere haiñ

sūraj chāñd sitāre mere

tūfāñ aur kināre mere

rishtoñ ke sab saa.e mere

apne aur parā.e mere

ḳhushbū merī rangat merī

nafrat aur mohabbat merī

saare din sab rāteñ merī

mausam kī sauġhāteñ merī

aaheñ merī aañsū mere

jiine ke sab pahlū mere

duniyā merī duniyā kī har ik shai merī

lekin merā vo maiñ jis ne

ḳhud mujh ko vus.at baḳhshī hai

kyā hai kaisā hai kitnā hai

merā kab hai

isī liye lagtā hai mujh ko

duniyā kī is bhiiḌ meñ shāyad

maiñ tanhā huuñ

sanson ka wo pahla lamha

KHwabon ki wo pahli saat

narm hawa ne jab mera ehsas chhua tha

KHushbu ne jab lab khole the

karb-e-basirat ne mere andar jhanka tha

harf-e-sadaqat ne mujh se sargoshi ki thi

ye sari duniya meri hai

aag hawa miTTi aur pani

sab par mera nam likha hai

uncha parbat khula aasman phaili dharti

dariya jangal sahra wadi

rone hansne ki aazadi

sab mere hain

suraj chand sitare mere

tufan aur kinare mere

rishton ke sab sae mere

apne aur parae mere

KHushbu meri rangat meri

nafrat aur mohabbat meri

sare din sab raaten meri

mausam ki saughaten meri

aahen meri aansu mere

jine ke sab pahlu mere

duniya meri duniya ki har ek shai meri

lekin mera wo main jis ne

KHud mujh ko wusat baKHshi hai

kya hai kaisa hai kitna hai

mera kab hai

isi liye lagta hai mujh ko

duniya ki is bhiD mein shayad

main tanha hun