hasan kuza-gar(3)

jahāñ-zād

vo halab kī kārvāñ-saraā kā hauz, raat vo sukūt

jis meñ ek dūsre se ham-kinār tairte rahe

muhīt jis tarah ho dā.ere ke gird halqā-zan

tamām raat tairte rahe the ham

ham ek dūsre ke jism o jaañ se lag ke

tairte rahe the ek shād-kām ḳhauf se

ki jaise paanī āñsuoñ meñ tairtā rahe

ham ek dūsre se mutma.in zavāl-e-umr ke ḳhilāf

tairte rahe

tū kah uThī 'hasan yahāñ bhī khīñch laa.ī

jaañ kī tishnagī tujhe!'

(lo apnī jaañ kī tishnagī ko yaad kar rahā thā maiñ

ki merā halq āñsuoñ kī be-bahā saḳhāvatoñ

se shād-kām ho gayā!)

magar ye vahm dil meñ tairne lagā ki ho na ho

mirā badan kahīñ halab ke hauz hī meñ rah gayā

nahīñ, mujhe duī kā vāhima nahīñ

ki ab bhī rabt-e-jism-o-jāñ kā e'tibār hai mujhe

yahī vo e'tibār thā

ki jis ne mujh ko aap meñ samo diyā

maiñ sab se pahle 'aap' huuñ

agar hamīñ hoñ tū ho aur maiñ huuñ phir bhī maiñ

har ek shai se pahle aap hoñ!

agar maiñ zinda huuñ to kaise aap se daġhā karūñ?

ki tere jaisī aurteñ, jahāñ-zād,

aisī uljhaneñ haiñ

jin ko aaj tak koī nahīñ 'sulajh' sakā

jo maiñ kahūñ ke maiñ 'sulajh' sakā to sar-ba-sar

fareb apne aap se!

ki auratoñ kī sāḳht hai vo tanz apne-āp par

javāb jis kā ham nahīñ

(labīb kaun hai? tamām raat jis kā zikr

tere lab pe thā

vo kaun tere gesuoñ ko khīñchtā rahā

laboñ ko nochtā rahā

jo maiñ kabhī na kar sakā

nahīñ ye sach hai maiñ huuñ yā labīb ho

raqīb ho to kis liye tirī ḳhud-āgahī kī be-riyā nashāt-e-nāb kā

jo sad-navā o yak-navā ḳhirām-e-sub.h kī tarah

labīb har navā-e-sāz-gār kī nafī sahī!)

magar hamārā rābta visāl-e-āb-o-gil nahīñ, na thā kabhī

vajūd-e-ādmī se āb-o-gil sadā barūñ rahe

na har visāl-e-āb-o-gil se koī jaam yā subū hī ban sakā

jo in kā ek vāhima hī ban sake to ban sake!

jahāñ-zād

ek tū aur ek vo aur ek maiñ

ye tiin zāviye kisī musallas-e-qadīm ke

hamesha ghūmte rahe

ki jaise merā chaak ghūmtā rahā

magar na apne-āp kā koī surāġh pā sake

musallas-e-qadīm ko maiñ toḌ, duuñ jo tū kahe, magar nahīñ

jo sehr mujh pe chaak kā vahī hai is musallas-e-qadīm kā

nigāheñ mere chaak kī jo mujh ko dekhtī haiñ

ghūmte hue

subū-o-jām par tirā badan tirā hī rañg terī nāzukī

baras paḌī

vo kīmiyā-garī tire jamāl kī baras paḌī

maiñ sail-e-nūr-e-andrūñ se dhul gayā!

mire daroñ kī ḳhalq yuuñ galī galī nikal paḌī

ki jaise sub.h kī azaañ sunā.ī dii!

tamām kuuze bante bante 'tuu' hī ban ke rah ga.e

nashāt is visāl-e-rah-guzar kī nā-gahāñ mujhe nigal ga.ī

yahī pyāla-o-surāhī-o-subū kā marhala hai vo

ki jab ḳhamīr-e-āb-o-gil se vo judā hue

to un ko samt-e-rāh-e-nau kī kāmrāniyāñ mileñ

maiñ ik ġharīb kūza-gar

ye intihā-e-mārifat

ye har pyāla-o-surāhī-o-subū kī intihā-e-mārifat

mujhe ho is kī kyā ḳhabar?

jahāñ-zād

intizār aaj bhī mujhe hai kyuuñ vahī magar

jo nau baras ke daur-e-nā-sazā meñ thaa?

ab intizār āñsuoñ ke dajla kā

na gumrahī kī raat kā

shab-e-gunah kī lazzatoñ kā itnā zikr kar chukā

vo ḳhud gunāh ban ga.īñ!

halab kī kārvāñ-sarā ke hauz kaa, na maut kā

na apnī is shikast-ḳhurdā zaat kā

ik intizār-e-be-amāñ kā taar hai bañdhā huaa!

kabhī jo chand sāniye zamān-e-be-zamāñ meñ aa ke ruk ga.e

to vaqt kā ye baar mere sar se bhī utar gayā

tamām rafta o guzishta sūrtoñ, tamām hādsoñ

ke sust qāfile

mire darūñ meñ jaag uThe

mere darūñ meñ ik jahān-e-bāz-yāftā kī rel-pel jaag uThī

bahisht jaise jaag uThe ḳhudā ke lā-shu.ūr meñ!

maiñ jaag uThā ġhunūdgī kī ret par paḌā huā

ġhunūdgī kī ret par paḌe hue vo kuuze jo

mire vajūd se barūñ

tamām reza reza ho ke rah ga.e the

mere apne-āp se firāq meñ

vo phir se ek kul bane (kisī navā-e-sāz-gār kī tarah)

vo phir se ek raqs-e-be-zamāñ bane

vo rūyat-e-azal bane!

jahan-zad

wo halab ki karwan-saraa ka hauz, raat wo sukut

jis mein ek dusre se ham-kinar tairte rahe

muhit jis tarah ho daere ke gird halqa-zan

tamam raat tairte rahe the hum

hum ek dusre ke jism o jaan se lag ke

tairte rahe the ek shad-kaam KHauf se

ki jaise pani aansuon mein tairta rahe

hum ek dusre se mutmain zawal-e-umr ke KHilaf

tairte rahe

tu kah uThi 'hasan yahan bhi khinch lai

jaan ki tishnagi tujhe!'

(lo apni jaan ki tishnagi ko yaad kar raha tha main

ki mera halq aansuon ki be-baha saKHawaton

se shad-kaam ho gaya!)

magar ye wahm dil mein tairne laga ki ho na ho

mera badan kahin halab ke hauz hi mein rah gaya

nahin, mujhe dui ka wahima nahin

ki ab bhi rabt-e-jism-o-jaan ka e'tibar hai mujhe

yahi wo e'tibar tha

ki jis ne mujh ko aap mein samo diya

main sab se pahle 'ap' hun

agar hamin hon tu ho aur main hun phir bhi main

har ek shai se pahle aap hon!

agar main zinda hun to kaise aap se dagha karun?

ki tere jaisi aurten, jahan-zad,

aisi uljhanen hain

jin ko aaj tak koi nahin 'sulajh' saka

jo main kahun ke main 'sulajh' saka to sar-ba-sar

fareb apne aap se!

ki auraton ki saKHt hai wo tanz apne-ap par

jawab jis ka hum nahin

(labib kaun hai? tamam raat jis ka zikr

tere lab pe tha

wo kaun tere gesuon ko khinchta raha

labon ko nochta raha

jo main kabhi na kar saka

nahin ye sach hai main hun ya labib ho

raqib ho to kis liye teri KHud-agahi ki be-riya nashat-e-nab ka

jo sad-nawa o yak-nawa KHiram-e-subh ki tarah

labib har nawa-e-saz-gar ki nafi sahi!)

magar hamara rabta visal-e-ab-o-gil nahin, na tha kabhi

wajud-e-admi se aab-o-gil sada barun rahe

na har visal-e-ab-o-gil se koi jam ya subu hi ban saka

jo in ka ek wahima hi ban sake to ban sake!

jahan-zad

ek tu aur ek wo aur ek main

ye tin zawiye kisi musallas-e-qadim ke

hamesha ghumte rahe

ki jaise mera chaak ghumta raha

magar na apne-ap ka koi suragh pa sake

musallas-e-qadim ko main toD, dun jo tu kahe, magar nahin

jo sehr mujh pe chaak ka wahi hai is musallas-e-qadim ka

nigahen mere chaak ki jo mujh ko dekhti hain

ghumte hue

subu-o-jam par tera badan tera hi rang teri nazuki

baras paDi

wo kimiya-gari tere jamal ki baras paDi

main sail-e-nur-e-andrun se dhul gaya!

mere daron ki KHalq yun gali gali nikal paDi

ki jaise subh ki azan sunai di!

tamam kuze bante bante 'tu' hi ban ke rah gae

nashat is visal-e-rah-guzar ki na-gahan mujhe nigal gai

yahi pyala-o-surahi-o-subu ka marhala hai wo

ki jab KHamir-e-ab-o-gil se wo juda hue

to un ko samt-e-rah-e-nau ki kaamraniyan milen

main ek gharib kuza-gar

ye intiha-e-marifat

ye har pyala-o-surahi-o-subu ki intiha-e-marifat

mujhe ho is ki kya KHabar?

jahan-zad

intizar aaj bhi mujhe hai kyun wahi magar

jo nau baras ke daur-e-na-saza mein tha?

ab intizar aansuon ke dajla ka

na gumrahi ki raat ka

shab-e-gunah ki lazzaton ka itna zikr kar chuka

wo KHud gunah ban gain!

halab ki karwan-sara ke hauz ka, na maut ka

na apni is shikast-KHurda zat ka

ek intizar-e-be-aman ka tar hai bandha hua!

kabhi jo chand saniye zaman-e-be-zaman mein aa ke ruk gae

to waqt ka ye bar mere sar se bhi utar gaya

tamam rafta o guzishta surton, tamam hadson

ke sust qafile

mere darun mein jag uThe

mere darun mein ek jahan-e-baz-yafta ki rel-pel jag uThi

bahisht jaise jag uThe KHuda ke la-shuur mein!

main jag uTha ghunudgi ki ret par paDa hua

ghunudgi ki ret par paDe hue wo kuze jo

mere wajud se barun

tamam reza reza ho ke rah gae the

mere apne-ap se firaq mein

wo phir se ek kul bane (kisi nawa-e-saz-gar ki tarah)

wo phir se ek raqs-e-be-zaman bane

wo ruyat-e-azal bane!