hashr

maiñ hairāñ huuñ

ki kis manzil meñ huuñ

mirī chāroñ taraf ik bhiiḌ sī hai

maiñ tanhā bhī nahīñ huuñ

magar tanhā.ī sī mahsūs hotī hai

to kyā ye hashr hai

sunā thā hashr hogā

saarī rūheñ ik ḳhudā hogā

yahī mauqa hisāb-o-adl kā hogā

shifā kaam aa.egī na rishta mo'atabar hogā

samajh meñ ye nahīñ aatā

ḳhudā maiñ huuñ yā ye sab haiñ

ye sab ke sab ḳhudā haiñ

aur mujh se chāhte haiñ

hisāb-e-dil hisāb-e-jāñ

hisāb rishta-e-qarz-e-garāñ

tavaqqo.a kī shuā.eñ har taraf se

merī jānib aa rahī haiñ

mujhe apnī nazar apnī samajh apnī sadā

khoī sī lagtī hai

kahīñ is ḳhaak meñ luthḌī sī lagtī hai

maiñ dhīre dhīre jaise ghaT rahā huuñ

miT rahā huuñ

ḳhudā maiñ ho nahīñ saktā

ḳhudā miTtā nahīñ hai

maiñ banda huuñ

mirā kyā hashr hogā

ye merā ḳhvāb hai yā vāqi.a hai

agar ye ḳhvāb hai to TuuT jaa.e

agar ye vāqi.a hai hashr hai to

us tavīl-o-garm din kī shaam ho jaa.e

maiñ sonā chāhtā huuñ

mukammal ḳhaak honā chāhtā huuñ

main hairan hun

ki kis manzil mein hun

meri chaaron taraf ek bhiD si hai

main tanha bhi nahin hun

magar tanhai si mahsus hoti hai

to kya ye hashr hai

suna tha hashr hoga

sari ruhen ek KHuda hoga

yahi mauqa hisab-o-adl ka hoga

shifa kaam aaegi na rishta mo'atabar hoga

samajh mein ye nahin aata

KHuda main hun ya ye sab hain

ye sab ke sab KHuda hain

aur mujh se chahte hain

hisab-e-dil hisab-e-jaan

hisab rishta-e-qarz-e-garan

tawaqqoa ki shuaen har taraf se

meri jaanib aa rahi hain

mujhe apni nazar apni samajh apni sada

khoi si lagti hai

kahin is KHak mein luthDi si lagti hai

main dhire dhire jaise ghaT raha hun

miT raha hun

KHuda main ho nahin sakta

KHuda miTta nahin hai

main banda hun

mera kya hashr hoga

ye mera KHwab hai ya waqia hai

agar ye KHwab hai to TuT jae

agar ye waqia hai hashr hai to

us tawil-o-garm din ki sham ho jae

main sona chahta hun

mukammal KHak hona chahta hun