hasrat-e-tamir

ye duniyā

phuul patthar aag miTTī

ret ke tūdoñ kā maskan hai

pahāḌoñ kī chaTānoñ aur Dhalānoñ

tez-rau dariyāoñ aur chashmoñ kā manzar hai

ye duniyā

nanhe-munne chāñd tāroñ kā hai gahvāra

jo mustaqbil kī nūrānī fazāoñ kī amānat haiñ

ye duniyā

ilm-o-fan science aur tahzīb kī

azmat kā maz.har hai

ye duniyā ḳhūbsūrat hai

bahut hī ḳhūbsūrat hai

magar taḳhrīb kā ik zarra atom

husn ko is ke

faqat ik lamha bhar meñ hī miTā sakne ke qābil hai

ye duniyā kaisī bad-qismat

ki is kā dushman-e-jāñ vo

jise ḳhud is ke beToñ ne banāyā hai

ye duniyā

kaash is taḳhrīb ke imkān ko yaksar miTā saktī

ye duniyā

kaash bas ta.amīr hī kā ruup ban saktī

ye duniyā

kaash phūloñ kā hasīñ manzar hī kahlātī

ye duniyā

kaash bachchoñ kī hañsī ma.asūmiyat aur phuul se chehre

hamesha ke liye mahfūz rakh saktī

ye duniyā kaash vo hotī

jise ḳhāliq ne ḳhud apne hī hāthoñ se banāyā thā

faqat ta.amīr kī ḳhātir

faqat ta.amīr kī ḳhātir

ye duniya

phul patthar aag miTTi

ret ke tudon ka maskan hai

pahaDon ki chaTanon aur Dhalanon

tez-rau dariyaon aur chashmon ka manzar hai

ye duniya

nanhe-munne chand taron ka hai gahwara

jo mustaqbil ki nurani fazaon ki amanat hain

ye duniya

ilm-o-fan science aur tahzib ki

azmat ka mazhar hai

ye duniya KHubsurat hai

bahut hi KHubsurat hai

magar taKHrib ka ek zarra atom

husn ko is ke

faqat ek lamha bhar mein hi miTa sakne ke qabil hai

ye duniya kaisi bad-qismat

ki is ka dushman-e-jaan wo

jise KHud is ke beTon ne banaya hai

ye duniya

kash is taKHrib ke imkan ko yaksar miTa sakti

ye duniya

kash bas tamir hi ka rup ban sakti

ye duniya

kash phulon ka hasin manzar hi kahlati

ye duniya

kash bachchon ki hansi masumiyat aur phul se chehre

hamesha ke liye mahfuz rakh sakti

ye duniya kash wo hoti

jise KHaliq ne KHud apne hi hathon se banaya tha

faqat tamir ki KHatir

faqat tamir ki KHatir