hassas

āḳhir vo

kis kī ġhalatī thī

us būḌhe kī

conductor kī

yā phir us bus ke driver kī

jis kī bhī ho

lekin is meñ

merā to koī dosh nahīñ thā

maiñ to baaqī

sab logoñ kī tarah

musāfir thā us bas kā

jis ke nīche

kahīñ achānak se

vo būḌhā aa jaatā hai

us ko

bus ke

nīche aate bhī to na dekhā thā maiñ ne

vo to bus ke

brake se merī

niiñd khulī aur

shor samā.at se Takrāyā

tab khiḌkī se jhāñkā thā maiñ

idhar udhar

bikhrī

sabzī ke

ird-gird

vo dhaar

lahū kī

saañp surekhā

reñg rahī thī

aur gale meñ

shāyad us ke

chīḳh kahīñ par phañsī huī thī

is manzar meñ

seat se apnī

hil tak na paayā thā maiñ to

hil kar bhī

ab honā kyā thā

āḳhir maiñ kar kyā saktā thā

phir kyoñ

mujh ko

niiñd nahīñ aatī us din se

khānā khāne

baiThtā huuñ to

us būḌhe kā

karbnāk vo

lahū ugalne vaalā chehra

sāmne mere aa jaatā hai

aur phir

us ke baa'd

nivāla

mire gale se

ulTī ban bāhar aatā hai

aur

maañs ko

phaaḌ ke

bāhar niklī

us būḌhe kī haDDī

mere dil meñ dhañs jaatī haiñ

kyoñ nā-karda jurm kā ye ehsās mire andar baiThā hai

kyā us ko maiñ ne maarā hai

us kī maut mirī ġhalatī hai

thoḌā bhī

hassās nahīñ hotā hai koī

logoñ ko

ehsās nahīñ hotā hai koī

mujh se sab

bas ye kahte haiñ

log to

marte hī rahte haiñ

kaun bhalā parvā kartā hai

tum hī

ḳhud ko qaid kiye ho us manzar meñ

us manzar se

bāhar aao

miTTī Daalo

dhuāñ uḌaao

lekin

maiñ kaise

samjhā.ūñ

ki us kā

aaseb mire

ḳhvāboñ meñ aa kar

roz yahī kahtā rahtā hai

mujh par ye ehsāñ karvā do

ghar par mere

biivī bachche

bhūke hoñge

un tak vo sabzī bhijvā do

aaKHir wo

kis ki ghalati thi

us buDhe ki

conductor ki

ya phir us bus ke driwer ki

jis ki bhi ho

lekin is mein

mera to koi dosh nahin tha

main to baqi

sab logon ki tarah

musafir tha us bas ka

jis ke niche

kahin achanak se

wo buDha aa jata hai

us ko

bus ke

niche aate bhi to na dekha tha main ne

wo to bus ke

brake se meri

nind khuli aur

shor samaat se Takraya

tab khiDki se jhanka tha main

idhar udhar

bikhri

sabzi ke

ird-gird

wo dhaar

lahu ki

sanp surekha

reng rahi thi

aur gale mein

shayad us ke

chiKH kahin par phansi hui thi

is manzar mein

seat se apni

hil tak na paya tha main to

hil kar bhi

ab hona kya tha

aaKHir main kar kya sakta tha

phir kyon

mujh ko

nind nahin aati us din se

khana khane

baiThta hun to

us buDhe ka

karbnak wo

lahu ugalne wala chehra

samne mere aa jata hai

aur phir

us ke ba'd

niwala

mere gale se

ulTi ban bahar aata hai

aur

mans ko

phaD ke

bahar nikli

us buDhe ki haDDi

mere dil mein dhans jati hain

kyon na-karda jurm ka ye ehsas mere andar baiTha hai

kya us ko main ne mara hai

us ki maut meri ghalati hai

thoDa bhi

hassas nahin hota hai koi

logon ko

ehsas nahin hota hai koi

mujh se sab

bas ye kahte hain

log to

marte hi rahte hain

kaun bhala parwa karta hai

tum hi

KHud ko qaid kiye ho us manzar mein

us manzar se

bahar aao

miTTi Dalo

dhuan uDao

lekin

main kaise

samjhaun

ki us ka

aaseb mere

KHwabon mein aa kar

roz yahi kahta rahta hai

mujh par ye ehsan karwa do

ghar par mere

biwi bachche

bhuke honge

un tak wo sabzi bhijwa do