ہتھیلی کا چاند

زندگی کے ان گھٹا ٹوپ اندھیروں میں

جب ہاتھ کو ہاتھ سجھائی نہیں دیتا تھا

نہ جانے کون تھا وہ

جو اس اجنبی سڑک پر مجھے تنہا چھوڑ گیا

اور میں اپنی سرد ہتھیلی پر

تقدیر کی لکیر تلاش کرتی رہی

غور سے دیکھا تو اندازہ ہوا

اب ہتھیلی کی سلیٹ سے ہر لکیر مٹ چکی تھی

اور اب میں اپنی زندگی کے خرابے میں

تنہا کھڑی تھی

اور پھر یوں ہوا

میں نے کچھ سوچ کر

اپنی ہتھیلی پر تیرا نام لکھا اور اسے چوم لیا

دیکھتے ہی دیکھتے

میرے من کے آنگن میں ایک چراغ روشن ہو گیا

اے میری تقدیر کے چاند

اب میں تیرا چہرہ دیکھ سکتی ہوں