hawa

havā mausam kī raqqāsa

pahan kar paañv meñ pattoñ ke ghuñghrū

Doltī jaa.e

kabhī uñglī pakaḌ kar bādaloñ kī jhuum kar gaa.e

kabhī bārish kī chādar oḌh kar

āñgan bhigo jaa.e

kisī ma.asūm laḌkī kā kabhī āñchal uḌā jaa.e

havā mausam kī raqqāsa

kabhī kaliyoñ ke ruḳhsāroñ pe

bose le sharārat se

kabhī khilte hue phūloñ kī shāḳhoñ

se judā kar de

kabhī laḌnā pahāḌoñ se

charāġhoñ se kabhī Takkar

yahī kashtī Dubo detī hai aksar lā ke sāhil par

havā mausam kī raqqāsa

chale jab sansanātī bachpanā āñchal meñ chhup jaa.e

bane bād-e-sabā jab bhī to ḳhushbueñ churā laa.e

kabhī ḳhushiyoñ kī lai par raqs kartī

ye nazar aa.e

kabhī TuuTī huī shahnā.iyoñ meñ siskiyāñ ban kar utar jaa.e

siyah-rātoñ meñ āñchal chāñdnī kā

DhūñDne nikle

bharī barsāt meñ bijlī se darpan māñgne nikle

havā mausam kī raqqāsa

agar ye thak ga.ī insān jiinā bhuul jā.egā

agar ye ruk ga.ī bādal barasnā bhuul jā.egā

duā ye hai na thakne paa.eñ is ke ye thirakte paañv

rahe ye raqs meñ mashġhūl sub.h-o-shām

havā mausam kī raqqāsa

hawa mausam ki raqqasa

pahan kar panw mein patton ke ghunghru

Dolti jae

kabhi ungli pakaD kar baadalon ki jhum kar gae

kabhi barish ki chadar oDh kar

aangan bhigo jae

kisi masum laDki ka kabhi aanchal uDa jae

hawa mausam ki raqqasa

kabhi kaliyon ke ruKHsaron pe

bose le shararat se

kabhi khilte hue phulon ki shaKHon

se juda kar de

kabhi laDna pahaDon se

charaghon se kabhi Takkar

yahi kashti Dubo deti hai aksar la ke sahil par

hawa mausam ki raqqasa

chale jab sansanati bachpana aanchal mein chhup jae

bane baad-e-saba jab bhi to KHushbuen chura lae

kabhi KHushiyon ki lai par raqs karti

ye nazar aae

kabhi TuTi hui shahnaiyon mein siskiyan ban kar utar jae

siyah-raaton mein aanchal chandni ka

DhunDne nikle

bhari barsat mein bijli se darpan mangne nikle

hawa mausam ki raqqasa

agar ye thak gai insan jina bhul jaega

agar ye ruk gai baadal barasna bhul jaega

dua ye hai na thakne paen is ke ye thirakte panw

rahe ye raqs mein mashghul subh-o-sham

hawa mausam ki raqqasa