hawa kahti rahi aao

havā kahtī rahī aao

chalo us khet ko chhū leñ

udhar is peḌ ke pattoñ meñ chhup kar tāliyāñ pīTeñ

gireñ uTTheñ luḌhak kar nahr meñ utreñ nahā.eñ

maḳhmalīñ sabze pe nange paañv chal kar duur tak jaa.eñ

havā kahtī rahī aao

magar maiñ ḳhushk chhāgal apne dāñtoñ meñ dabā.e

pyaas kī barham sipah se laḌ rahā thā maiñ kahāñ jaatā

mujhe sūraj ke rath se ātishīñ tīroñ kā aanā

aur chhāgal se humak kar aab kā girnā

kisī bachche kā ronā aur paanī māñgnā bhūlā nahīñ thā maiñ kahāñ jaatā

maiñ apne haath par ubhrī ragoñ meñ qaid

apnī aañkh kī taptī huī reg-e-ravāñ meñ jazb thā yaksar

mujhe ik jur.a-e-āb-e-safā darkār thā aur mere bachche ne

sadā dī thī mujhe aao ḳhudārā ab to aa jaao

ki mere hoñT ab phaT bhī chuke

āñkhoñ kā amrit suukh kar bādal banā uḌ bhī gayā

havā kahtī rahī aao

ye bandhan toḌ do pyāre

magar maiñ haath par ubhrī ragoñ meñ qaid

apnī aañkh kī taptī huī reg-e-ravāñ meñ jazb kyā kartā

kahāñ jaatā

hawa kahti rahi aao

chalo us khet ko chhu len

udhar is peD ke patton mein chhup kar taliyan piTen

giren uTThen luDhak kar nahr mein utren nahaen

maKHmalin sabze pe nange panw chal kar dur tak jaen

hawa kahti rahi aao

magar main KHushk chhagal apne danton mein dabae

pyas ki barham sipah se laD raha tha main kahan jata

mujhe suraj ke rath se aatishin tiron ka aana

aur chhagal se humak kar aab ka girna

kisi bachche ka rona aur pani mangna bhula nahin tha main kahan jata

main apne hath par ubhri ragon mein qaid

apni aankh ki tapti hui reg-e-rawan mein jazb tha yaksar

mujhe ek jura-e-ab-e-safa darkar tha aur mere bachche ne

sada di thi mujhe aao KHudara ab to aa jao

ki mere honT ab phaT bhi chuke

aankhon ka amrit sukh kar baadal bana uD bhi gaya

hawa kahti rahi aao

ye bandhan toD do pyare

magar main hath par ubhri ragon mein qaid

apni aankh ki tapti hui reg-e-rawan mein jazb kya karta

kahan jata