hawa lauTe to puchhen

roz-o-shab kā vaqfa karb-o-musarrat

shaam kahte haiñ jise

kyūñkar guzāreñ

qarz sāñsoñ kā utāreñ yā ruḳh-e-hastī

nikhāreñ

kaun hai dil ke sivā us karb-e-rāz-e-pīkarāñ

maiñ apne saath

ab kise āvāz deñ kis ko pukāreñ

shām-bhar kī fursat-e-ġham yuuñ guzāreñ

dhuul meñ aTe hue ik rāste par ek

goshe ke ḳhalā meñ kā.enāt ābād hai ik

chā.e-ḳhāne kī jahāñ din Dhalte aa.e din

havā-e-shām mezoñ kursiyoñ kī dā.era

dar dā.era shāḳhoñ meñ phailā ik shajar-e-ġham

kā ugā detī hai

jis ke saa.e meñ bikhre hue pattoñ kī sūrat

saare din kī sañg-bārī se shikasta

reza reza ā.īne bikhre hue milte haiñ

jin ke saare zaḳhmī aks apnī ruuh ke

apnī anā ke ārzuoñ ḳhvāhishoñ

mahrūmiyoñ aur hasratoñ ke ujḌe aalam haiñ

vahī hai rahguzar pathrīlī sāñsoñ kī vahī

biptā vahī ham haiñ

vahī hai zindagī

is tund-ḳhū bezār būḌhe kī tarah

jo apne māthe par shikan Daale ḳhafā baiThā hai sab se

aur sab meñ

chaa.e ke kaḌve kasīle ghūñT pyāloñ meñ uñDele

bāñTtā hai

aur har pyāle meñ us ke māthe kī taaza shikan kā aks hai

ye zindagī

har shaam us būḌhe kī mānind apnā melā aks dohrātī hai

aur ye zindagī

ik tez-pā maġhrūr motor-kār kī sūrat ḳhas-o-ḳhāshāk

ke bādal uḌātī aur hamāre chashm-o-sar meñ jhoñktī hai

ham chale aate haiñ phir bhī shaam ke us dast meñ jis ke

musāfir har tarah ke log haiñ

kuchh log jo ik chaa.e kī pyālī se aane vaale din kī

kāmrānī kā

munavvar aks le jaate haiñ jin kī guftugū hī besh-o-kam ke fikr se

aage nahīñ baḌhtī

roz-o-shab ka waqfa karb-o-musarrat

sham kahte hain jise

kyunkar guzaren

qarz sanson ka utaren ya ruKH-e-hasti

nikhaaren

kaun hai dil ke siwa us karb-e-raaz-e-pikaran

main apne sath

ab kise aawaz den kis ko pukaren

sham-bhar ki fursat-e-gham yun guzaren

dhul mein aTe hue ek raste par ek

goshe ke KHala mein kaenat aabaad hai ek

chae-KHane ki jahan din Dhalte aae din

hawa-e-sham mezon kursiyon ki daera

dar daera shaKHon mein phaila ek shajar-e-gham

ka uga deti hai

jis ke sae mein bikhre hue patton ki surat

sare din ki sang-bari se shikasta

reza reza aaine bikhre hue milte hain

jin ke sare zaKHmi aks apni ruh ke

apni ana ke aarzuon KHwahishon

mahrumiyon aur hasraton ke ujDe aalam hain

wahi hai rahguzar pathrili sanson ki wahi

bipta wahi hum hain

wahi hai zindagi

is tund-KHu bezar buDhe ki tarah

jo apne mathe par shikan Dale KHafa baiTha hai sab se

aur sab mein

chae ke kaDwe kasile ghunT pyalon mein unDele

banTta hai

aur har pyale mein us ke mathe ki taza shikan ka aks hai

ye zindagi

har sham us buDhe ki manind apna mela aks dohraati hai

aur ye zindagi

ek tez-pa maghrur motor-kar ki surat KHas-o-KHashak

ke baadal uDati aur hamare chashm-o-sar mein jhonkti hai

hum chale aate hain phir bhi sham ke us dast mein jis ke

musafir har tarah ke log hain

kuchh log jo ek chae ki pyali se aane wale din ki

kaamrani ka

munawwar aks le jate hain jin ki guftugu hi besh-o-kam ke fikr se

aage nahin baDhti