hawa meri raaz-dan nahin hai

havā mirī rāz-dāñ nahīñ hai

ki chatar is kā

hazār sāyoñ pe mehrbāñ hai

karoḌoñ logoñ ke soz-e-anfās kā dhuāñ hai

havā faqat us nahīf lamhe kī dāstāñ hai

ki jis kā aalam guzishtanī hai

jo ik nafas kā hī mehmāñ hai

havā hī saarī mahak ugaltī huī bahāroñ kī tarjumāñ hai

hamāre andar chhupe vajūdoñ

subuk masāmoñ kī rāz-dāñ hai

guzarte jismoñ ko nashr kartī huī havā rāz-dāñ nahīñ hai

magar havā tere mere ḳhvāboñ ke darmiyāñ saañs

phūñktī hai

hamārī sāñsoñ kī Doriyoñ ko

hamāre jismoñ se joḌtī hai

hamāre tāñbe hamāre pītal hamāre sab sāgvān chehre

hamāre apnoñ ke tan kī ThanDī mahak ke ġhāze se

Dhāñptī hai

mirā havā se faqat yahī ek rābta hai

use mirā rāz-dāñ na kahnā

havā se apne azāb-e-lamhāt kī koī dāstāñ na kahnā

hawa meri raaz-dan nahin hai

ki chatar is ka

hazar sayon pe mehrban hai

karoDon logon ke soz-e-anfas ka dhuan hai

hawa faqat us nahif lamhe ki dastan hai

ki jis ka aalam guzishtani hai

jo ek nafas ka hi mehman hai

hawa hi sari mahak ugalti hui bahaaron ki tarjuman hai

hamare andar chhupe wajudon

subuk masamon ki raaz-dan hai

guzarte jismon ko nashr karti hui hawa raaz-dan nahin hai

magar hawa tere mere KHwabon ke darmiyan sans

phunkti hai

hamari sanson ki Doriyon ko

hamare jismon se joDti hai

hamare tanbe hamare pital hamare sab sagwan chehre

hamare apnon ke tan ki ThanDi mahak ke ghaze se

Dhanpti hai

mera hawa se faqat yahi ek rabta hai

use mera raaz-dan na kahna

hawa se apne azab-e-lamhat ki koi dastan na kahna