hawa us se kahna

havā

sub.h-dam us kī āhista āhista khultī huī aañkh se

ḳhvāb kī sīpiyāñ chunñe jaa.e to kahnā

ki ham jāgte haiñ

havā us se kahnā

ki jo hijr kī aag piitī rutoñ kī tanābeñ

ragoñ se ulajhtī huī saañs ke saath kas deñ

unheñ raat ke surma.ī haath ḳhairāt meñ niiñd kab de sake haiñ

havā us ke baazū pe likkhā huā koī ta.avīz bāñdhe to kahnā

ki āvārgī oḌh kar saañs lete musāfir

tujhe khojte khojte thak ga.e haiñ

havā us se kahnā

ki ham ne tujhe khojne kī sabhī ḳhvāhishoñ ko

udāsī kī dīvār meñ chun diyā hai

havā us se kahnā

ki vahshī darindoñ kī bastī ko jaate hue rāstoñ par

tire naqsh-e-pā dekh kar

ham ne dil meñ tire naam ke har taraf

ik siyah mātamī hāshiya bun diyā hai

havā us se kahnā

havā kuchh na kahnā

havā kuchh na kahnā

hawa

subh-dam us ki aahista aahista khulti hui aankh se

KHwab ki sipiyan chunne jae to kahna

ki hum jagte hain

hawa us se kahna

ki jo hijr ki aag piti ruton ki tanaben

ragon se ulajhti hui sans ke sath kas den

unhen raat ke surmai hath KHairaat mein nind kab de sake hain

hawa us ke bazu pe likkha hua koi tawiz bandhe to kahna

ki aawargi oDh kar sans lete musafir

tujhe khojte khojte thak gae hain

hawa us se kahna

ki hum ne tujhe khojne ki sabhi KHwahishon ko

udasi ki diwar mein chun diya hai

hawa us se kahna

ki wahshi darindon ki basti ko jate hue raston par

tere naqsh-e-pa dekh kar

hum ne dil mein tere nam ke har taraf

ek siyah matami hashiya bun diya hai

hawa us se kahna

hawa kuchh na kahna

hawa kuchh na kahna