hawa

bahut din se

ka.ī an-dekhe ilzāmāt ke baa.is

havā matlūb hai ham ko

havā tārīk rātoñ meñ

hamāre ḳhvāb le jaatī hai

aur vāpas nahīñ kartī

hamāre ḳhat churātī hai

hamāre dil kī bāteñ

rāh-gīroñ ko sunātī hai

hamāre giit

maidānoñ galī kūchoñ meñ gaatī hai

ham apne dil ke

zañg-ālūd ḳhānoñ meñ

mohabbat joḌ ke rakhte haiñ

lekin shaam hote hī

havā ik narm jhoñke se

ye ḳhāne khol letī hai

vahāñ jo kuchh hai le jaatī hai

aur ham se ijāzat tak nahīñ letī

mohabbat qarz hai

ye baat kahne kī

hameñ mohlat nahīñ detī

hameñ kāġhaz pe apnā naam

apne zimme vājib ḳhvāb

likhne kī suhulat tak nahīñ detī

havā par jurm ko sābit hue

muddat huī shāyad

havā mafrūr hai jab se

havā aa.ī to ham us ko

kisī andhe kueñ meñ band kar deñge

yā ik tārīk tah-ḳhāne meñ le jā kar

samundar se ziyāda be-karāñ

tanhā.ī kā pāband kar deñge

agar mumkin huā to ham havā ko

ḳhushk pattoñ kī tarah se

ḳhaak kā paivand kar deñge

bahut din se

kai an-dekhe ilzamat ke bais

hawa matlub hai hum ko

hawa tarik raaton mein

hamare KHwab le jati hai

aur wapas nahin karti

hamare KHat churaati hai

hamare dil ki baaten

rah-giron ko sunati hai

hamare git

maidanon gali kuchon mein gati hai

hum apne dil ke

zang-alud KHanon mein

mohabbat joD ke rakhte hain

lekin sham hote hi

hawa ek narm jhonke se

ye KHane khol leti hai

wahan jo kuchh hai le jati hai

aur hum se ijazat tak nahin leti

mohabbat qarz hai

ye baat kahne ki

hamein mohlat nahin deti

hamein kaghaz pe apna nam

apne zimme wajib KHwab

likhne ki suhulat tak nahin deti

hawa par jurm ko sabit hue

muddat hui shayad

hawa mafrur hai jab se

hawa aai to hum us ko

kisi andhe kuen mein band kar denge

ya ek tarik tah-KHane mein le ja kar

samundar se ziyaada be-karan

tanhai ka paband kar denge

agar mumkin hua to hum hawa ko

KHushk patton ki tarah se

KHak ka paiwand kar denge