hayat-e-jawidan

hai jin meñ zauq-e-āzādī vo zindānoñ meñ rahte haiñ

vahī bastī basāte haiñ jo vīrānoñ meñ rahte haiñ

sukūñ maqsūd hai jin ko unheñ jiinā nahīñ aatā

shu.ūr-e-zindagī jin meñ hai tūfānoñ meñ rahte haiñ

miTā kar apnī hastī dars de jaate haiñ aalam ko

shahīdān-e-vafā ke zikr afsānoñ meñ rahte haiñ

tabī.at kis qadar āzād hai in marne vāloñ kī

ki jin kī ḳhaak ke zarre bayābānoñ meñ rahte haiñ

hayāt-e-jāvidāñ miltī hai hastī ke miTāne se

masarrat un kā hissa hai jo ġham-ḳhānoñ meñ rahte haiñ

jo soz-e-ishq rakhte haiñ lagī rahtī hai lau un ko

tajallī DhūñDne vaale hī parvānoñ meñ rahte haiñ

jasārat zauq-e-nazzāra kī paidā kar nigāhoñ meñ

numūd-e-husn ke anvār paimānoñ meñ rahte haiñ

vo ham-mashrab vo ham-sohbat jinheñ apnā samajhte the

misāl-e-sabza-e-begāna begānoñ meñ rahte haiñ

qafas kā dar banā dete haiñ rashk-e-bāb-e-āzādī

jo ahl-e-hosh haiñ 'takmīl' zindānoñ meñ rahte haiñ

hai jin mein zauq-e-azadi wo zindanon mein rahte hain

wahi basti basate hain jo viranon mein rahte hain

sukun maqsud hai jin ko unhen jina nahin aata

shuur-e-zindagi jin mein hai tufanon mein rahte hain

miTa kar apni hasti dars de jate hain aalam ko

shahidan-e-wafa ke zikr afsanon mein rahte hain

tabiat kis qadar aazad hai in marne walon ki

ki jin ki KHak ke zarre bayabanon mein rahte hain

hayat-e-jawidan milti hai hasti ke miTane se

masarrat un ka hissa hai jo gham-KHanon mein rahte hain

jo soz-e-ishq rakhte hain lagi rahti hai lau un ko

tajalli DhunDne wale hi parwanon mein rahte hain

jasarat zauq-e-nazzara ki paida kar nigahon mein

numud-e-husn ke anwar paimanon mein rahte hain

wo ham-mashrab wo ham-sohbat jinhen apna samajhte the

misal-e-sabza-e-begana beganon mein rahte hain

qafas ka dar bana dete hain rashk-e-bab-e-azadi

jo ahl-e-hosh hain 'takmil' zindanon mein rahte hain