hayat-e-rawan

ba-zāhir kahīñ koī halchal nahīñ hai

hayāt-e-ravāñ apne markaz se chimTī huī hai

bahut aam be-kār uljhe dinoñ kī

mulā.em sī gaThrī meñ rakkhī huī

ek be-nām sī dopahar hai

havā chal rahī hai

na jaane kahāñ

gahre bechain bādal ke TukḌe

uḌe jā rahe haiñ

pareshān saḌkoñ pe bahte hue zard patte

fazā meñ bikhartā huā kuchh ġhubār-e-musalsal

zarā pal do pal ko

bahut duur pattoñ pe hañstā huā

tez sūraj

magar phir chamaktī huī ik kiran par

jhapaTte hue gadle bādal

khule āsmāñ par Thaharte nahīñ haiñ

havā chaltī rahtī hai ruktī nahīñ hai

daraḳhtoñ pe shāḳheñ

idhar se udhar Doltī haiñ

idhar se udhar

merī chashm-e-tasavvur meñ uḌte hue chand TukḌe

lapakte jhapakte ḳhayālāt ke maile bādal

kahīñ sat.h-e-dil par Thaharte nahīñ haiñ

ba-zāhir jahāñ koī halchal nahīñ hai

magar ye ġhubār-e-musalsal uḌaa.e chalī jā rahī hai

havā chaltī rahtī hai ruktī nahīñ hai

hayāt-e-ravāñ apne markaz se chimTī huī hai

magar be-nām sī dopahar ke

sukūt-e-nihāñ meñ

ajab be-kalī hai

ba-zahir kahin koi halchal nahin hai

hayat-e-rawan apne markaz se chimTi hui hai

bahut aam be-kar uljhe dinon ki

mulaem si gaThri mein rakkhi hui

ek be-nam si dopahar hai

hawa chal rahi hai

na jaane kahan

gahre bechain baadal ke TukDe

uDe ja rahe hain

pareshan saDkon pe bahte hue zard patte

faza mein bikharta hua kuchh ghubar-e-musalsal

zara pal do pal ko

bahut dur patton pe hansta hua

tez suraj

magar phir chamakti hui ek kiran par

jhapaTte hue gadle baadal

khule aasman par Thaharte nahin hain

hawa chalti rahti hai rukti nahin hai

daraKHton pe shaKHen

idhar se udhar Dolti hain

idhar se udhar

meri chashm-e-tasawwur mein uDte hue chand TukDe

lapakte jhapakte KHayalat ke maile baadal

kahin sath-e-dil par Thaharte nahin hain

ba-zahir jahan koi halchal nahin hai

magar ye ghubar-e-musalsal uDae chali ja rahi hai

hawa chalti rahti hai rukti nahin hai

hayat-e-rawan apne markaz se chimTi hui hai

magar be-nam si dopahar ke

sukut-e-nihan mein

ajab be-kali hai