hello best friend

maiñ bahut saada thā har baat ko saada samjhā

phuul ko phuul kahā taare ko taarā samjhā

dost ko baam kahā ḳhvāb ko ziina samjhā

maiñ ne tanhā.ī ko hī hukm ḳhudā kā samjhā

mujh ko kyā ilm thā iḳhlās kise kahte haiñ

kyā hai dariyā kā sukūñ pyaas kise kahte haiñ

mujh se ye pūchhte banvās kise kahte haiñ

rā.egāñ hone kā ehsās kise kahte haiñ

bad-tar-az-hijr miirī bazm-e-tarab hotī thī

ek bechainī sī har shaam ajab hotī thī

ye to ma.alūm nahīñ kis ke sabab hotī thī

phir bhī rah-rah ke zamāne kī talab hotī thī

vaqt badlā to mire naam kā taara niklā

jaise bachche kā koī lafz ho pahlā pahlā

jaise pyāsā koī aa kar lab-e-dariyā machlā

jaise kohsār ke goshe pe musāfir sañbhlā

aise tum aa.e ki sahrā pe ravānī aa.e

jaise siitā ke qarīñ raam nishānī aa.e

niiñd ke māroñ kī āñkhoñ meñ kahānī aa.e

sāloñ se tanhā paḌe uulā pe saanī aa.e

jāgtī āñkhoñ se kuchh ḳhvāb dikhā.e tum ne

rāh-e-ummīd pe sab naqsh banā.e tum ne

merī hastī ke ma.ānī bhī batā.e tum ne

qāfiye maiñ ne chune aur nibhā.e tum ne

tum musavvir kā fusūñ tum ho suḳhanvar kā kamāl

tum ḳhizāoñ se bahut duur bahāroñ kā ḳhayāl

tum ne dekhā hai masarrat kā safar ġham kā zavāl

tum ne hañstī huī āñkhoñ se bhī pūchhe haiñ savāl

jaise ik naav ho mujh tālib-e-sāhil ke liye

ḳhvāb kī sham.a kisī niiñd kī mahfil ke liye

hausla bhejā ho rab ne dil-e-buzdil ke liye

tum mohabbat se ziyāda ho mire dil ke liye

bāñjh dhartī ke kaleje pe uge misl-e-chaman

mujh se be-rang ko ḳhush-rang banāne meñ magan

sharmsārī ke añdhere meñ ra.ūnat kī kiran

ai mire dost mirī jaan mirī vaj.h-e-suḳhan

mere hone kī zamāne meñ vazāhat karnā

dil ke jazbāt kī duniyā se hifāzat karnā

vaise mushkil hai kisī par bhī ye nemat karnā

phir bhī mumkin ho to tā-umr mohabbat karnā

main bahut sada tha har baat ko sada samjha

phul ko phul kaha tare ko tara samjha

dost ko baam kaha KHwab ko zina samjha

main ne tanhai ko hi hukm KHuda ka samjha

mujh ko kya ilm tha iKHlas kise kahte hain

kya hai dariya ka sukun pyas kise kahte hain

mujh se ye puchhte banwas kise kahte hain

raegan hone ka ehsas kise kahte hain

bad-tar-az-hijr meri bazm-e-tarab hoti thi

ek bechaini si har sham ajab hoti thi

ye to malum nahin kis ke sabab hoti thi

phir bhi rah-rah ke zamane ki talab hoti thi

waqt badla to mere nam ka tara nikla

jaise bachche ka koi lafz ho pahla pahla

jaise pyasa koi aa kar lab-e-dariya machla

jaise kohsar ke goshe pe musafir sanbhla

aise tum aae ki sahra pe rawani aae

jaise sita ke qarin ram nishani aae

nind ke maron ki aankhon mein kahani aae

salon se tanha paDe ula pe sani aae

jagti aankhon se kuchh KHwab dikhae tum ne

rah-e-ummid pe sab naqsh banae tum ne

meri hasti ke maani bhi batae tum ne

qafiye main ne chune aur nibhae tum ne

tum musawwir ka fusun tum ho suKHanwar ka kamal

tum KHizaon se bahut dur bahaaron ka KHayal

tum ne dekha hai masarrat ka safar gham ka zawal

tum ne hansti hui aankhon se bhi puchhe hain sawal

jaise ek naw ho mujh talib-e-sahil ke liye

KHwab ki shama kisi nind ki mahfil ke liye

hausla bheja ho rab ne dil-e-buzdil ke liye

tum mohabbat se ziyaada ho mere dil ke liye

banjh dharti ke kaleje pe uge misl-e-chaman

mujh se be-rang ko KHush-rang banane mein magan

sharmsari ke andhere mein raunat ki kiran

ai mere dost meri jaan meri wajh-e-suKHan

mere hone ki zamane mein wazahat karna

dil ke jazbaat ki duniya se hifazat karna

waise mushkil hai kisi par bhi ye nemat karna

phir bhi mumkin ho to ta-umr mohabbat karna