hichki

tumheñ ye ġham hai ki ab chiTThiyāñ nahīñ ātīñ

hamārī socho hameñ hichkiyāñ nahīñ ātīñ

charāġh sharmā

kabhī bhī kyā sochā hai ye tum ne

ki jo hai lahroñ kā yuuñ machalnā

nadī kā sāgar kī samt chalnā

daraḳht kā biij se nikalnā

har ek pal vaqt kā badalnā

ye roz din raat kā guzarnā

na ek mausam kā bhī Thaharnā

ujāle dauḌe jo jā rahe haiñ

kahīñ añdhere miTā rahe haiñ

jo sāloñ sāloñ lage hue haiñ

safar meñ ab tak DaTe hue haiñ

sitāroñ sayyāroñ sab kī gardish

unheñ samajhne kī apnī ḳhvāhish

diloñ ke dhaḌkan kī ibtidā bhī

tamām manzar kī intihā bhī

ye silsila saarā

sab tasalsul meñ hai jo

har kuchh

kisī kī hichkī kā hai natīja

ki yaad kartā ho koī biite zamāne ko

kā.enāt-bhar meñ

ki jab nahīñ thā kuchh

us se pahle

jo thā vo kyā thā

vo kaisā thā

kyā vo aisā thā

jaisā hai abhī sab

ik 'arse se mujh ko hichkī aa.ī nahīñ hai

tum to rahe mujhe yaad karne se

ā.īne ko taktā huuñ roz

ḳhud ko hī yaad aa jā.ūñ maiñ kabhī to

aur ek hichkī nikal paḌe phir

tumhein ye gham hai ki ab chiTThiyan nahin aatin

hamari socho hamein hichkiyan nahin aatin

charagh sharma

kabhi bhi kya socha hai ye tum ne

ki jo hai lahron ka yun machalna

nadi ka sagar ki samt chalna

daraKHt ka bij se nikalna

har ek pal waqt ka badalna

ye roz din raat ka guzarna

na ek mausam ka bhi Thaharna

ujale dauDe jo ja rahe hain

kahin andhere miTa rahe hain

jo salon salon lage hue hain

safar mein ab tak DaTe hue hain

sitaron sayyaron sab ki gardish

unhen samajhne ki apni KHwahish

dilon ke dhaDkan ki ibtida bhi

tamam manzar ki intiha bhi

ye silsila sara

sab tasalsul mein hai jo

har kuchh

kisi ki hichki ka hai natija

ki yaad karta ho koi bite zamane ko

kaenat-bhar mein

ki jab nahin tha kuchh

us se pahle

jo tha wo kya tha

wo kaisa tha

kya wo aisa tha

jaisa hai abhi sab

ek 'arse se mujh ko hichki aai nahin hai

tum to rahe mujhe yaad karne se

aaine ko takta hun roz

KHud ko hi yaad aa jaun main kabhi to

aur ek hichki nikal paDe phir