hijr-kada

maiñ ne kamre kī khūñTī par

terā intizār Taañg diyā hai

aur merī be-qarār āñkheñ

kamre kī chaukhaT par dharī haiñ

tere firāq ke siyāh lamhoñ kī

bāteñ kartī merī saarī nazmeñ

kamre kī dīvāroñ par chaspāñ haiñ

merī aatī jaatī sāñseñ

ghaḌī kī sūiyoñ se bañdhī haiñ

aur tumhāre amrit-ras Tapkāte jumle

mere dhyān kā pallū pakḌe chup baiThe haiñ

tere lams kī ḳhvāhish mere hāthoñ

kī poroñ se nikal kar

kamre meñ chakrātī phirtī hai

tere lauT aane kā rasta taktā

har ik manzar hijr-zada hai

aur tumhāre lauT aane tak

mere chāroñ jānib phailā hijr-kada hai

main ne kamre ki khunTi par

tera intizar Tang diya hai

aur meri be-qarar aankhen

kamre ki chaukhaT par dhari hain

tere firaq ke siyah lamhon ki

baaten karti meri sari nazmen

kamre ki diwaron par chaspan hain

meri aati jati sansen

ghaDi ki suiyon se bandhi hain

aur tumhaare amrit-ras Tapkate jumle

mere dhyan ka pallu pakDe chup baiThe hain

tere lams ki KHwahish mere hathon

ki poron se nikal kar

kamre mein chakraati phirti hai

tere lauT aane ka rasta takta

har ek manzar hijr-zada hai

aur tumhaare lauT aane tak

mere chaaron jaanib phaila hijr-kada hai