hijr nagri

tirī maujūdgī maujūd hai to phir

yahāñ sab kuchh

mujhe phīkā fanā jaisā

sukūt-e-marg jaisā lag rahā hai kyoñ

na duniyā hai na shor-o-ġhul

na hangāme

na dil ko khīñchte maile jhamele haiñ

na logoñ ke tamāshe haiñ na āñkhoñ meñ koī raunaq

na sāñsoñ meñ harārat hai

na hāthoñ meñ qalam mere

na hī takiye tale ġhazleñ na hī nazmeñ

na zulfoñ ko sañvarnā aa rahā hai aur na ab eyebrow

meñ haiñ dhanak qauseñ na mascare se palkoñ ko shab kī syāhī dī

na surme se banā.ī tuur sī āñkheñ

na ab saaḌī pahantī huuñ

na ab paTiyāla shalvāreñ na kurte aur na chūḌī-dār pājāme

na nāḳhun nail-polish se banātī huuñ sitāre maiñ

na 'ātif' kā koī gaanā sunā hai aur na 'rāhat' kī qavvālī hī

ajab bezār se din-rāt haiñ mere

na bādal haiñ na bārish hai

na jugnū haiñ parinde haiñ

yūñhī be-vaqt rotī huuñ

damā-dam bas

aḌhā.ī tiin tak maiñ raat ke sotī huuñ āḳhir ye

huā kyā hai mujhe 'sādī'

ye kyā vīrānagī hai sāmne mere

mirā kamra hai yā sahrā

mirī āñkheñ haiñ yā dariyā

huā kyā hai khule kuchh to

baḌī ma.asūm laḌkī huuñ

mujhe kab yaad hai maiñ huuñ muqayyad kuchh dinoñ se

hijr nagrī meñ

teri maujudgi maujud hai to phir

yahan sab kuchh

mujhe phika fana jaisa

sukut-e-marg jaisa lag raha hai kyon

na duniya hai na shor-o-ghul

na hangame

na dil ko khinchte maile jhamele hain

na logon ke tamashe hain na aankhon mein koi raunaq

na sanson mein hararat hai

na hathon mein qalam mere

na hi takiye tale ghazlen na hi nazmen

na zulfon ko sanwarna aa raha hai aur na ab eyebrow

mein hain dhanak qausen na mascare se palkon ko shab ki syahi di

na surme se banai tur si aankhen

na ab saDi pahanti hun

na ab paTiyala shalwaren na kurte aur na chuDi-dar pajame

na naKHun nail-polish se banati hun sitare main

na 'atif' ka koi gana suna hai aur na 'rahat' ki qawwali hi

ajab bezar se din-raat hain mere

na baadal hain na barish hai

na jugnu hain parinde hain

yunhi be-waqt roti hun

dama-dam bas

aDhai tin tak main raat ke soti hun aaKHir ye

hua kya hai mujhe 'sadi'

ye kya viranagi hai samne mere

mera kamra hai ya sahra

meri aankhen hain ya dariya

hua kya hai khule kuchh to

baDi masum laDki hun

mujhe kab yaad hai main hun muqayyad kuchh dinon se

hijr nagri mein