hijrat

bahut dinoñ se mujhe intizār hai lekin

tumhāre shahr se koī yahāñ nahīñ aayā

maiñ sochtā huuñ to bas ye ki ab tumhārī shakl

guzarte vaqt ke hāthoñ badal ga.ī hogī

ḳhamīda zulfoñ kī kaalī ghaTā meñ ab shāyad

safed bāloñ kī ta.adād baḌh ga.ī ho gī

tumhāre gaal pe jo ek til chamaktā thā

pata nahīñ vo chamak is meñ ab bhī baaqī hai

tumhārī āñkhoñ meñ ik chāñdnī sī raushan thī

pata nahīñ vo damak is meñ ab bhī baaqī hai

tumhārī bātoñ meñ phūloñ kī sī mahak thī jo

pata nahīñ vo mahak ab bhī sunñe vaale ko

mashām-e-jāñ meñ utar kar nihāl kartī hai

tumhāre māthe pe jo ek chāñd raushan thā

mujhe gumān hai vo chāñd bujh gayā hogā

maiñ sochtā huuñ to bas is qadar ki ab tum ne

purāne qisse ko dil se bhulā diyā hogā

yaqīñ mujhe bhī hai ab mil na pā.eñge ham tum

magar ye rishta-e-dil kas tarah se toḌā jaa.e

fasāna jo ki mukammal na ho sakā us ko

kahāñ pe ḳhatm kiyā jaa.e kaise moḌā jaa.e

bahut dinoñ se mujhe intizār hai lekin

tumhāre shahr se koī yahāñ nahīñ aayā

bahut dinon se mujhe intizar hai lekin

tumhaare shahr se koi yahan nahin aaya

main sochta hun to bas ye ki ab tumhaari shakl

guzarte waqt ke hathon badal gai hogi

KHamida zulfon ki kali ghaTa mein ab shayad

safed baalon ki tadad baDh gai ho gi

tumhaare gal pe jo ek til chamakta tha

pata nahin wo chamak is mein ab bhi baqi hai

tumhaari aankhon mein ek chandni si raushan thi

pata nahin wo damak is mein ab bhi baqi hai

tumhaari baaton mein phulon ki si mahak thi jo

pata nahin wo mahak ab bhi sunne wale ko

masham-e-jaan mein utar kar nihaal karti hai

tumhaare mathe pe jo ek chand raushan tha

mujhe guman hai wo chand bujh gaya hoga

main sochta hun to bas is qadar ki ab tum ne

purane qisse ko dil se bhula diya hoga

yaqin mujhe bhi hai ab mil na paenge hum tum

magar ye rishta-e-dil kas tarah se toDa jae

fasana jo ki mukammal na ho saka us ko

kahan pe KHatm kiya jae kaise moDa jae

bahut dinon se mujhe intizar hai lekin

tumhaare shahr se koi yahan nahin aaya