hikmat ka but-KHana

sharāb-e-shor se labrez hai duniyā kā paimāna

harīf-e-dīn-o-dānish hai mazāq-e-pīr-e-mai-ḳhāna

bashar iblīs ko tazvīr-e-nau kā dars detā hai

muzayyan hai gunāh-e-gūnāgūñ se har parī-ḳhāna

ulūm-e-nau se raushan bazm hai tahzīb-e-hāzir kī

yad-e-tajdīd ne Dhālā hai dil-āvez but-ḳhāna

ye maanā maġhribī ta.alīm ne parvāz baḳhshī hai

ye māh-o-ḳhur bhī ban jā.eñge ab qindīl kā shāna

ḳhudā ke chāhne vaale abhī tak bhole-bhāle haiñ

banā rakhā hai harz-e-jāñ sadā maazī kā afsāna

gunāh-e-tāza kī taḳhlīq se iblīs qāsir hai

dimāġh-e-fitna-jū par hai musallat zo.f-e-pīrāna

bahut majbūr be-chāra hai ḳhud pīrāna-sālī se

use ma.alūm kyā hai ma.asiyat kā taaza paimāna

ḳhudā vaale ta.ajjub hai ki ma.asūm-o-muqaddas haiñ

azāb-e-nau-ba-nau se hai murassā ā.ina-ḳhāna

rah-e-tashkīk par raḳhsh-e-hunar paiham ḳhirāmāñ hai

bahut mushkil hai fitrat kā abhī tasḳhīr farmānā

musāvāt-e-nazar kā muddatoñ se shor suntā huuñ

fazā duniyā kī hai lekin abhī tak firqā-vārāna

havas kā dars to yaaro bahut hī ḳhuub hai lekin

abhī qur.ān kī tafhīm se aajiz hai farzāna

butoñ kā toḌnā thā kār-e-āsāñ ahd-e-māzī meñ

vale mushkil hai Dhānā aaj kī hikmat kā but-ḳhāna

qulūb-e-asr-e-hāzir meñ abhī īmān Dhal jaa.e

faqīroñ kā nahīñ dekhā hai ejāz-e-kalīmāna

tafāḳhur ke marīzoñ ke liye iksīr hotī hai

sarāsar banda-e-'bebāk' kī tarz-e-faqīrāna

sharab-e-shor se labrez hai duniya ka paimana

harif-e-din-o-danish hai mazaq-e-pir-e-mai-KHana

bashar iblis ko tazwir-e-nau ka dars deta hai

muzayyan hai gunah-e-gunagun se har pari-KHana

ulum-e-nau se raushan bazm hai tahzib-e-hazir ki

yad-e-tajdid ne Dhaala hai dil-awez but-KHana

ye mana maghribi talim ne parwaz baKHshi hai

ye mah-o-KHur bhi ban jaenge ab qindil ka shana

KHuda ke chahne wale abhi tak bhole-bhaale hain

bana rakha hai harz-e-jaan sada mazi ka afsana

gunah-e-taza ki taKHliq se iblis qasir hai

dimagh-e-fitna-ju par hai musallat zof-e-pirana

bahut majbur be-chaara hai KHud pirana-sali se

use malum kya hai masiyat ka taza paimana

KHuda wale tajjub hai ki masum-o-muqaddas hain

azab-e-nau-ba-nau se hai murassa aaina-KHana

rah-e-tashkik par raKHsh-e-hunar paiham KHiraman hai

bahut mushkil hai fitrat ka abhi tasKHir farmana

musawat-e-nazar ka muddaton se shor sunta hun

faza duniya ki hai lekin abhi tak firqa-warana

hawas ka dars to yaro bahut hi KHub hai lekin

abhi quran ki tafhim se aajiz hai farzana

buton ka toDna tha kar-e-asan ahd-e-mazi mein

wale mushkil hai Dhana aaj ki hikmat ka but-KHana

qulub-e-asr-e-hazir mein abhi iman Dhal jae

faqiron ka nahin dekha hai ejaz-e-kalimana

tafaKHur ke marizon ke liye iksir hoti hai

sarasar banda-e-'bebak' ki tarz-e-faqirana