himala

ai himāla ai fasīl-e-kishvar-e-hindustān

chūmtā hai terī peshānī ko jhuk kar āsmāñ

tujh meñ kuchh paidā nahīñ derīna rozī ke nishāñ

tū javāñ hai gardish-e-shām-o-sahar ke darmiyāñ

ek jalva thā kalīm-e-tūr-e-sīnā ke liye

tū tajallī hai sarāpā chashm-e-bīnā ke liye

imtihān-e-dīda-e-zāhir meñ kohistāñ hai tū

pāsbāñ apnā hai tū dīvār-e-hindustāñ hai tū

matla-e-avval falak jis kā ho vo dīvāñ hai tū

sū-e-ḳhalvat-gāh-e-dil dāman-kash-e-insāñ hai tū

barf ne bāñdhī hai dastār-e-fazīlat tere sar

ḳhanda-zan hai jo kulāh-e-mehr-e-ālam-tāb par

terī umr-e-rafta kī ik aan hai ahd-e-kuhan

vādiyoñ meñ haiñ tirī kaalī ghaTā.eñ ḳhema-zan

choTiyāñ terī surayyā se haiñ sargarm-e-suḳhan

tū zamīñ par aur pahnā-e-falak terā vatan

chashma-e-dāman tirā ā.īna-e-sayyāl hai

dāman-e-mauj-e-havā jis ke liye rūmāl hai

abr ke hāthoñ meñ rahvār-e-havā ke vāste

tāziyāna de diyā barq-e-sar-e-kohsār ne

ai himāla koī bāzī-gāh hai tū bhī jise

dast-e-qudrat ne banāyā hai anāsir ke liye

haa.e kyā fart-e-tarab meñ jhūmtā jaatā hai abr

fīl-e-be-zanjīr kī sūrat uḌā jaatā hai abr

jumbish-e-mauj-e-nasīm-e-sub.h gahvāra banī

jhūmtī hai nashsha-e-hastī meñ har gul kī kalī

yuuñ zabān-e-barg se goyā hai us kī ḳhāmushī

dast-e-gul-chīñ kī jhaTak maiñ ne nahīñ dekhī kabhī

kah rahī hai merī ḳhāmoshī hī afsāna mirā

kunj-e-ḳhalvat ḳhāna-e-qudrat hai kāshāna mirā

aatī hai naddī farāz-e-koh se gaatī huī

kausar o tasnīm kī maujoñ ko sharmātī huī

ā.īna sā shāhid-e-qudrat ko dikhlātī huī

sañg-e-rah se gaah bachtī gaah Takrātī huī

chheḌtī jā is irāq-e-dil-nashīñ ke saaz ko

ai musāfir dil samajhtā hai tirī āvāz ko

laila-e-shab kholtī hai aa ke jab zulf-e-rasā

dāman-e-dil khīñchtī hai ābshāroñ kī sadā

vo ḳhamoshī shaam kī jis par takallum ho fidā

vo daraḳhtoñ par tafakkur kā samāñ chhāyā huā

kāñptā phirtā hai kyā rañg-e-shafaq kohsār par

ḳhush-numā lagtā hai ye ġhāza tire ruḳhsār par

ai himāla dāstāñ us vaqt kī koī sunā

maskan-e-ābā-e-insāñ jab banā dāman tirā

kuchh batā us sīdhī-sādhī zindagī kā mājrā

daaġh jis par ġhāza-e-rañg-e-taklluf kā na thā

haañ dikhā de ai tasavvur phir vo sub.h o shaam tū

dauḌ pīchhe kī taraf ai gardish-e-ayyām tū

ai himala ai fasil-e-kishwar-e-hindustan

chumta hai teri peshani ko jhuk kar aasman

tujh mein kuchh paida nahin derina rozi ke nishan

tu jawan hai gardish-e-sham-o-sahar ke darmiyan

ek jalwa tha kalim-e-tur-e-sina ke liye

tu tajalli hai sarapa chashm-e-bina ke liye

imtihan-e-dida-e-zahir mein kohistan hai tu

pasban apna hai tu diwar-e-hindustan hai tu

matla-e-awwal falak jis ka ho wo diwan hai tu

su-e-KHalwat-gah-e-dil daman-kash-e-insan hai tu

barf ne bandhi hai dastar-e-fazilat tere sar

KHanda-zan hai jo kulah-e-mehr-e-alam-tab par

teri umr-e-rafta ki ek aan hai ahd-e-kuhan

wadiyon mein hain teri kali ghaTaen KHema-zan

choTiyan teri surayya se hain sargarm-e-suKHan

tu zamin par aur pahna-e-falak tera watan

chashma-e-daman tera aaina-e-sayyal hai

daman-e-mauj-e-hawa jis ke liye rumal hai

abr ke hathon mein rahwar-e-hawa ke waste

taziyana de diya barq-e-sar-e-kohsar ne

ai himala koi bazi-gah hai tu bhi jise

dast-e-qudrat ne banaya hai anasir ke liye

hae kya fart-e-tarab mein jhumta jata hai abr

fil-e-be-zanjir ki surat uDa jata hai abr

jumbish-e-mauj-e-nasim-e-subh gahwara bani

jhumti hai nashsha-e-hasti mein har gul ki kali

yun zaban-e-barg se goya hai us ki KHamushi

dast-e-gul-chin ki jhaTak main ne nahin dekhi kabhi

kah rahi hai meri KHamoshi hi afsana mera

kunj-e-KHalwat KHana-e-qudrat hai kashana mera

aati hai naddi faraaz-e-koh se gati hui

kausar o tasnim ki maujon ko sharmati hui

aaina sa shahid-e-qudrat ko dikhlati hui

sang-e-rah se gah bachti gah Takraati hui

chheDti ja is iraq-e-dil-nashin ke saz ko

ai musafir dil samajhta hai teri aawaz ko

laila-e-shab kholti hai aa ke jab zulf-e-rasa

daman-e-dil khinchti hai aabshaaron ki sada

wo KHamoshi sham ki jis par takallum ho fida

wo daraKHton par tafakkur ka saman chhaya hua

kanpta phirta hai kya rang-e-shafaq kohsar par

KHush-numa lagta hai ye ghaza tere ruKHsar par

ai himala dastan us waqt ki koi suna

maskan-e-aba-e-insan jab bana daman tera

kuchh bata us sidhi-sadhi zindagi ka majra

dagh jis par ghaza-e-rang-e-taklluf ka na tha

han dikha de ai tasawwur phir wo subh o sham tu

dauD pichhe ki taraf ai gardish-e-ayyam tu