himala se do do baaten

bhalā majāl kahāñ mujh se be-zabānoñ kī

ki muñh se baat kahūñ kuchh falak nishānoñ kī

tire vajūd se aalam ye ho gayā raushan

ki ḳhāk-e-hind meñ rif.at hai āsmānoñ kī

vo phuul haiñ tire dāman meñ sāmne jin ke

bahār gard hai duniyā ke gulistānoñ kī

guphāoñ se tirī nikleñ to saare aalam meñ

sadā.eñ guuñj uThīñ tauhīd ke tarānoñ kī

bulandiyoñ se tirī jab ravāñ hue chashme

hayāt jin se hai duniyā ke bāġhbānoñ kī

mai-e-majāz meñ jo nashsha-e-haqīqat hai

vo yādgār hai to ishq ke fasānoñ kī

tirī bulandī ġhurūr-e-vaqār ke aage

chalī na ek havā.ī-jahāz-rānoñ kī

vo suur phūñk de apne lab-e-mubārak se

ki yaad taaza ho bhūle hue fasānoñ kī

aTal hoñ jin ke irāde ḳhayāl jin ke buland

uTheñ ab aise zamīn-e-vatan se hausla-mand

bhala majal kahan mujh se be-zabanon ki

ki munh se baat kahun kuchh falak nishanon ki

tere wajud se aalam ye ho gaya raushan

ki KHak-e-hind mein rifat hai aasmanon ki

wo phul hain tere daman mein samne jin ke

bahaar gard hai duniya ke gulistanon ki

guphaon se teri niklen to sare aalam mein

sadaen gunj uThin tauhid ke taranon ki

bulandiyon se teri jab rawan hue chashme

hayat jin se hai duniya ke baghbanon ki

mai-e-majaz mein jo nashsha-e-haqiqat hai

wo yaadgar hai to ishq ke fasanon ki

teri bulandi ghurur-e-waqar ke aage

chali na ek hawai-jahaz-ranon ki

wo sur phunk de apne lab-e-mubarak se

ki yaad taza ho bhule hue fasanon ki

aTal hon jin ke irade KHayal jin ke buland

uThen ab aise zamin-e-watan se hausla-mand