hina-na-basta hatheliyon ke nam

dhanak oḌh kar phir rahī ho magar

tum ne sochā kabhī

ye ThanDī phuvāreñ

tumhāre sulagte badan ko ḳhunuk-bāriyāñ de sakeñgī

aaj tak

kitne tapte hue mausamoñ ne jalāyā hai tan kā shajar

zindagī kī khulī muTThiyoñ meñ sabhī āñdhiyāñ

bāñjh jazbāt kī sard hotī huī raakh bhartī rahīñ

dard kī siip meñ ek bhī buuñd motī nahīñ ban sakī

dil ke kashkol meñ ek sikka masarrat kā khankā nahīñ

pyāse hoñToñ ke nam sāhiloñ ke badan

tishnagī kī jamī ret par kasmasāte rahe

phuul jaltī hathelī ke kumhlā ga.e

uñgliyoñ par ḳhizāñ chhā ga.ī

zulf kī sab siyah nāgineñ

kāshmīr aur shimle kī pagDanDiyāñ ban ga.iiñ

bhīgī palkoñ pe rakkhe hue sab charāġhoñ ko

bhūkī sahar khā ga.ī

dhanak oḌh kar phir rahī ho magar

tum ne sochā kabhī

aaj tak kitnī shahzādiyāñ

pāñchvīñ samt se

aane vaale kisī shāhzāde kī ummīd meñ

kaale dev.oñ ke

andhe kuoñ meñ nazar-band haiñ

dhanak oḌh kar

yūñhī kab tak phirogī bhalā

ḳhudārā uTho

apnī taqdīr ke munsifoñ se

ye pūchho zarā

jhūTī shaan aur shaukat ke patthar tale

kab talak haath mehñdī se

aur maañg sust-rang afshāñ se ḳhālī rahegī

vo purānī havelī jo purkhoñ kī hai

yā vo tālāb ke paas vaalī zamīñ

yā

dasahrī kī ḳhushbū se mahkā huā baaġh vo

kyoñ nahīñ bechte

dhanak oḌh kar phir rahī ho magar

ye to pūchho zarā

dhanak oDh kar phir rahi ho magar

tum ne socha kabhi

ye ThanDi phuwaren

tumhaare sulagte badan ko KHunuk-bariyan de sakengi

aaj tak

kitne tapte hue mausamon ne jalaya hai tan ka shajar

zindagi ki khuli muTThiyon mein sabhi aandhiyan

banjh jazbaat ki sard hoti hui rakh bharti rahin

dard ki sip mein ek bhi bund moti nahin ban saki

dil ke kashkol mein ek sikka masarrat ka khanka nahin

pyase honTon ke nam sahilon ke badan

tishnagi ki jami ret par kasmasate rahe

phul jalti hatheli ke kumhla gae

ungliyon par KHizan chha gai

zulf ki sab siyah naginen

kashmir aur shimle ki pagDanDiyan ban gain

bhigi palkon pe rakkhe hue sab charaghon ko

bhuki sahar kha gai

dhanak oDh kar phir rahi ho magar

tum ne socha kabhi

aaj tak kitni shahzadiyan

panchwin samt se

aane wale kisi shahzade ki ummid mein

kale dewon ke

andhe kuon mein nazar-band hain

dhanak oDh kar

yunhi kab tak phirogi bhala

KHudara uTho

apni taqdir ke munsifon se

ye puchho zara

jhuTi shan aur shaukat ke patthar tale

kab talak hath mehndi se

aur mang sust-rang afshan se KHali rahegi

wo purani haweli jo purkhon ki hai

ya wo talab ke pas wali zamin

ya

dasahri ki KHushbu se mahka hua bagh wo

kyon nahin bechte

dhanak oDh kar phir rahi ho magar

ye to puchho zara