hindi musalman

hindī musalmān huuñ maiñ hindī musalmān

ūñchā parbat gahrā sāgar aur chatiyal maidān

banjar sahrā bahtā dariyā khetī aur khaliyān

sab dhan merā kuTiyā ho yā qasr-e-ālīshān

bhārat maatā merī hai ye merā hindostān

hindī musalmān huuñ maiñ hindī musalmān

mere dil kā nuur hai merī aañkh kā taarā des

jagmag jagmag kartā hai anvār se saarā des

jitnā pyārā diin hai mujh ko utnā pyārā des

giitā aur granth haiñ mere merā hai qur.ān

hindī musalmān huuñ maiñ hindī musalmān

sun leñ mere bairī dushman rahzan dushT kaThor

prem kā bal hai mere man meñ bhiim kā tan meñ zor

uttar dakhkhan pūrab pachchhim dhuum hai chāroñ or

mere jiite jī kyā hogā bhārat kā apmān

hindī musalmān huuñ maiñ hindī musalmān

chappe-chappe par haiñ ma.ābid aur un ke mīnār

kūche-kūche meñ haiñ maqābir aur un ke anvār

zarre-zarre meñ haiñ mere aabā ke āsār

mere jigar ke ḳhuun se baaqī mere vatan kī shaan

hindī musalmān huuñ maiñ hindī musalmān

sab se pahle des meñ chamkī hai merī talvār

añgrezoñ kī nazroñ meñ huuñ maiñ pahlā ġhaddār

ab tak jag meñ guuñj rahī hai Tiipū kī lalkār

kaun vafā ke bandoñ par rakh saktā hai bohtān

hindī musalmān huuñ maiñ hindī musalmān

'kichlū' kā iḳhlās hai mujh meñ 'ajmal' kā kirdār

sarhad ke gāñdhī kī azmat 'jauhar' ke afkār

shāh-e-zafar kī himmat jis ne mar ke na maanī haar

ab bhī mere saath haiñ lākhoñ 'abdullāh' 'usmān'

hindī musalmān huuñ maiñ hindī musalmān

mujh ko apne des meñ ho saktā hai kis kā ḳhauf

bhārat kī āzād fazāoñ meñ hai ab kyā ḳhauf

mar jaanā jab bar-haq hai to maut se kaisā ḳhauf

ik din apne des pe mujh ko honā hai qurbān

hindī musalmān huuñ maiñ hindī musalmān

hindi musalman hun main hindi musalman

uncha parbat gahra sagar aur chatiyal maidan

banjar sahra bahta dariya kheti aur khaliyan

sab dhan mera kuTiya ho ya qasr-e-alishan

bhaarat mata meri hai ye mera hindostan

hindi musalman hun main hindi musalman

mere dil ka nur hai meri aankh ka tara des

jagmag jagmag karta hai anwar se sara des

jitna pyara din hai mujh ko utna pyara des

gita aur granth hain mere mera hai quran

hindi musalman hun main hindi musalman

sun len mere bairi dushman rahzan dushT kaThor

prem ka bal hai mere man mein bhim ka tan mein zor

uttar dakhkhan purab pachchhim dhum hai chaaron or

mere jite ji kya hoga bhaarat ka apman

hindi musalman hun main hindi musalman

chappe-chappe par hain maabid aur un ke minar

kuche-kuche mein hain maqabir aur un ke anwar

zarre-zarre mein hain mere aaba ke aasar

mere jigar ke KHun se baqi mere watan ki shan

hindi musalman hun main hindi musalman

sab se pahle des mein chamki hai meri talwar

angrezon ki nazron mein hun main pahla ghaddar

ab tak jag mein gunj rahi hai Tipu ki lalkar

kaun wafa ke bandon par rakh sakta hai bohtan

hindi musalman hun main hindi musalman

'kichlu' ka iKHlas hai mujh mein 'ajmal' ka kirdar

sarhad ke gandhi ki azmat 'jauhar' ke afkar

shah-e-zafar ki himmat jis ne mar ke na mani haar

ab bhi mere sath hain lakhon 'abdullah' 'usman'

hindi musalman hun main hindi musalman

mujh ko apne des mein ho sakta hai kis ka KHauf

bhaarat ki aazad fazaon mein hai ab kya KHauf

mar jaana jab bar-haq hai to maut se kaisa KHauf

ek din apne des pe mujh ko hona hai qurban

hindi musalman hun main hindi musalman