ہندی مسلمان

ہندی مسلمان ہوں میں ہندی مسلمان

اونچا پربت گہرا ساگر اور چٹئیل میدان

بنجر صحرا بہتا دریا کھیتی اور کھلیان

سب دھن میرا کٹیا ہو یا قصر عالیشان

بھارت ماتا میری ہے یہ میرا ہندوستان

ہندی مسلمان ہوں میں ہندی مسلمان

میرے دل کا نور ہے میری آنکھ کا تارا دیس

جگ مگ جگ مگ کرتا ہے انوار سے سارا دیس

جتنا پیارا دین ہے مجھ کو اتنا پیارا دیس

گیتا اور گرنتھ ہیں میرے میرا ہے قرآن

ہندی مسلمان ہوں میں ہندی مسلمان

سن لیں میرے بیری دشمن رہزن دشٹ کٹھور

پریم کا بل ہے میرے من میں بھیم کا تن میں زور

اتر دکھن پورب پچھم دھوم ہے چاروں اور

میرے جیتے جی کیا ہوگا بھارت کا اپمان

ہندی مسلمان ہوں میں ہندی مسلمان

چپے چپے پر ہیں معابد اور ان کے مینار

کوچے کوچے میں ہیں مقابر اور ان کے انوار

ذرے ذرے میں ہیں میرے آبا کے آثار

میرے جگر کے خون سے باقی میرے وطن کی شان

ہندی مسلمان ہوں میں ہندی مسلمان

سب سے پہلے دیس میں چمکی ہے میری تلوار

انگریزوں کی نظروں میں ہوں میں پہلا غدار

اب تک جگ میں گونج رہی ہے ٹیپو کی للکار

کون وفا کے بندوں پر رکھ سکتا ہے بہتان

ہندی مسلمان ہوں میں ہندی مسلمان

کچلوؔ کا اخلاص ہے مجھ میں اجملؔ کا کردار

سرحد کے گاندھی کی عظمت جوہرؔ کے افکار

شاہ ظفر کی ہمت جس نے مر کے نہ مانی ہار

اب بھی میرے ساتھ ہیں لاکھوں عبداللہؔ عثمانؔ

ہندی مسلمان ہوں میں ہندی مسلمان

مجھ کو اپنے دیس میں ہو سکتا ہے کس کا خوف

بھارت کی آزاد فضاؤں میں ہے اب کیا خوف

مر جانا جب برحق ہے تو موت سے کیسا خوف

اک دن اپنے دیس پہ مجھ کو ہونا ہے قربان

ہندی مسلمان ہوں میں ہندی مسلمان