hindostani bachche

bachcho tum taqdīr ho kal ke hindostān kī

baapū ke vardān kī nehru ke armān kī

aaj ke TuuTe khañDaroñ par tum kal desh basāoge

jo ham logoñ se na huā vo tum kar ke dikhlāoge

tum nannhī buniyādeñ ho duniyā ke na.e vidhān kī

bachcho tum taqdīr ho kal ke hindostān kī

jo sadiyoñ ke baad milī hai vo āzādī kho.e na

diin dharam ke naam pe koī biij phuuT kā bo.e na

har maz.hab se ūñchī hai qīmat insānī jaan kī

bachcho tum taqdīr ho kal ke hindostān kī

phir koī jai-chand na ubhre phir koī jāfar na uTThe

ġhairoñ kā dil ḳhush karne ko apnoñ par ḳhanjar na uTThe

dhan daulat ke lālach meñ tauhīn na ho īmān kī

bachcho tum taqdīr ho kal ke hindostān kī

bahut dinoñ tak is duniyā meñ riit rahī hai jangoñ kī

laḌī haiñ dhan vāloñ kī ḳhātir faujeñ bhūke nañgoñ kī

koī luTerā le na sake ab qurbānī insān kī

bachcho tum taqdīr ho kal ke hindostān kī

rah na sake ab is duniyā meñ yug sarmāya-dārī kā

tum ko jhanDā lahrānā hai mehnat kī sardārī kā

hal hoñ ab mazdūroñ ke aur khetī ho dahqān kī

bachcho tum taqdīr ho kal ke hindostān kī

bachcho tum taqdir ho kal ke hindostan ki

bapu ke wardan ki nehru ke arman ki

aaj ke TuTe khanDaron par tum kal desh basaoge

jo hum logon se na hua wo tum kar ke dikhlaoge

tum nannhi buniyaaden ho duniya ke nae widhan ki

bachcho tum taqdir ho kal ke hindostan ki

jo sadiyon ke baad mili hai wo aazadi khoe na

din dharam ke nam pe koi bij phuT ka boe na

har mazhab se unchi hai qimat insani jaan ki

bachcho tum taqdir ho kal ke hindostan ki

phir koi jai-chand na ubhre phir koi jafar na uTThe

ghairon ka dil KHush karne ko apnon par KHanjar na uTThe

dhan daulat ke lalach mein tauhin na ho iman ki

bachcho tum taqdir ho kal ke hindostan ki

bahut dinon tak is duniya mein rit rahi hai jangon ki

laDi hain dhan walon ki KHatir faujen bhuke nangon ki

koi luTera le na sake ab qurbani insan ki

bachcho tum taqdir ho kal ke hindostan ki

rah na sake ab is duniya mein yug sarmaya-dari ka

tum ko jhanDa lahrana hai mehnat ki sardari ka

hal hon ab mazduron ke aur kheti ho dahqan ki

bachcho tum taqdir ho kal ke hindostan ki