hindu muslim

qayāmat kī ghaḌī hai inqilābī suur bajte haiñ

kahīñ bijlī kaḌaktī hai kahīñ bādal garajte haiñ

jo hūreñ ḳhair-o-shar kī laḌtī aa.ī haiñ vo laḌtī haiñ

tamaddun kāñptā hai ummateñ bantī bigaḌtī haiñ

purānī satvatoñ kī bārgāheñ haiñ tazalzul meñ

nayā daur aa rahā hai ab zamāne ke tasalsul meñ

vo rūThe mante jaate haiñ jinheñ manñā na aatā thā

vo bigḌe ban ga.e āḳhir jinheñ banñā na aatā thā

magar hindostāñ hindostāñ hindostāñ he he

zamīñ is kī na badlī aur na badlā āsmān he he

farishte har sahar rote haiñ is kī bad-nasībī par

bhare kumbe kī maañ mātam kare apnī ġharībī par

koī hai mādar-e-be-kas kā haq pahchānñe vaalā

bahut haiñ jānñe vaale koī hai mānñe vaalā

koī hai jo jigar kī aag se shab ko sahar kar de

koī hai hindū muslim ko ki jo shīr-o-shakar kar de

koī hai is niyastāñ ko jo phir gulshan banā Daale

koī hai jo ḳhas-o-ḳhāshāk ko yaksar jalā Daale

koī hai jo navā-e-ishq se mahfil ko garmā de

koī hai jo vafā kī huuk se sīnoñ ko barmā de

koī phir akbar-o-nānak kī rūhoñ ko jagā detā

kabīr-o-jā.isī ke raag phir koī sunā detā

vo din bhī thā kabhī aur aaj ye din hai ki aapas meñ

hai aisī roz-afzūñ phuuT jo aatī nahīñ bas meñ

ye kyuuñ hai us ko sochā bhī kabhī ai sochne vaale

paḌe kyuuñ apne hāthoñ ham ko apnī jaan ke laale

nazar kā zāviya badlā to dil badle nazar badlī

hamārā hī jo ruḳh badlā to shab badlī sahar badlī

hamīñ phir apne mustaqbil ke ruukh ko moḌ sakte haiñ

hamīñ apnī banā.ī sarhadoñ ko toḌ sakte haiñ

javāno aao apnī ġhairatoñ ko mil ke lālkāreñ

unheñ Dhā deñ khaḌī haiñ aaj jo nafrat kī dīvāreñ

qayamat ki ghaDi hai inqilabi sur bajte hain

kahin bijli kaDakti hai kahin baadal garajte hain

jo huren KHair-o-shar ki laDti aai hain wo laDti hain

tamaddun kanpta hai ummaten banti bigaDti hain

purani satwaton ki bargahen hain tazalzul mein

naya daur aa raha hai ab zamane ke tasalsul mein

wo ruThe mante jate hain jinhen manna na aata tha

wo bigDe ban gae aaKHir jinhen banna na aata tha

magar hindostan hindostan hindostan he he

zamin is ki na badli aur na badla aasman he he

farishte har sahar rote hain is ki bad-nasibi par

bhare kumbe ki man matam kare apni gharibi par

koi hai madar-e-be-kas ka haq pahchanne wala

bahut hain jaanne wale koi hai manne wala

koi hai jo jigar ki aag se shab ko sahar kar de

koi hai hindu muslim ko ki jo shir-o-shakar kar de

koi hai is niyastan ko jo phir gulshan bana Dale

koi hai jo KHas-o-KHashak ko yaksar jala Dale

koi hai jo nawa-e-ishq se mahfil ko garma de

koi hai jo wafa ki huk se sinon ko barma de

koi phir akbar-o-nanak ki ruhon ko jaga deta

kabir-o-jaisi ke rag phir koi suna deta

wo din bhi tha kabhi aur aaj ye din hai ki aapas mein

hai aisi roz-afzun phuT jo aati nahin bas mein

ye kyun hai us ko socha bhi kabhi ai sochne wale

paDe kyun apne hathon hum ko apni jaan ke lale

nazar ka zawiya badla to dil badle nazar badli

hamara hi jo ruKH badla to shab badli sahar badli

hamin phir apne mustaqbil ke rukh ko moD sakte hain

hamin apni banai sarhadon ko toD sakte hain

jawano aao apni ghairaton ko mil ke lalkaren

unhen Dha den khaDi hain aaj jo nafrat ki diwaren