hisab-e-kam-o-besh

maiñ kitāb-e-ġham-e-hastī kī huuñ tahrīr koī

uljhī uljhī sī ho pechīda sī tafsīr koī

maiñ ki ik jabr-e-musalsal meñ pisā jaatā huuñ

dhuñdlī dhuñdlī sī ibārat maiñ banā jaatā huuñ

jabr aisā hai ki lamhoñ kī ḳhatā.eñ jaise

ban ga.iiñ sadiyoñ kī vo saarī sazā.eñ jaise

jabr kī had bhī muqarrar nahīñ merī ḳhātir

ya.anī maiñ sāda-mizāj aur vo zālim shātir

pūchhtā bhī nahīñ mujh se ki tirā sabr hai kyoñ

aur vazāhat bhī nahīñ is kī ki ye jabr hai kyoñ

pahle ḳhushbū mirī gum-gashta sī rāhoñ kī mile

phir sazā jo bhī mile karda gunāhoñ kī mile

maiñ vo tahrīr huuñ paḌhtā nahīñ jis ko koī

aur paḌh le to samajhtā nahīñ jis ko koī

rasm-e-ḳhat ajnabī jis kā vo ibārat huuñ maiñ

jis kī buniyād hai ḳhasta vo imārat huuñ maiñ

makḌiyoñ ne mire atrāf bune haiñ jaale

ye haiñ jaale mire samjhe hue dekhe-bhāle

chāñdnī merī hai aur na hī sitāre mere

merī kashtī hai na dhāre na kināre mere

mere māthe pe tabassum kī shikan bhī hogī

us ke pīchhe ka.ī rishtoñ kī thakan bhī hogī

maiñ pahuñch jā.ūñgā ik roz zamīñ ke nīche

ḳhaak hī hogī phir is ḳhāk-nashīñ ke nīche

gard jam jā.egī ik roz mirī turbat par

phir to maiñ ro bhī na pā.ūñgā tirī harakat par

zehn mā.ūf hai aur dil abhī shaq hai merā

tujh pe ai umr-e-ravāñ thoḌā to haq hai merā

ai mirī ruuh ke mālik ye muqaddar kar de

maiñ ġham-e-zīst kā maarā mujhe patthar kar de

yā hisāb-e-kam-o-besh aaj barābar kar de

yā mirī ruuh mire jism se bāhar kar de

main kitab-e-gham-e-hasti ki hun tahrir koi

uljhi uljhi si ho pechida si tafsir koi

main ki ek jabr-e-musalsal mein pisa jata hun

dhundli dhundli si ibarat main bana jata hun

jabr aisa hai ki lamhon ki KHataen jaise

ban gain sadiyon ki wo sari sazaen jaise

jabr ki had bhi muqarrar nahin meri KHatir

yani main sada-mizaj aur wo zalim shatir

puchhta bhi nahin mujh se ki tera sabr hai kyon

aur wazahat bhi nahin is ki ki ye jabr hai kyon

pahle KHushbu meri gum-gashta si rahon ki mile

phir saza jo bhi mile karda gunahon ki mile

main wo tahrir hun paDhta nahin jis ko koi

aur paDh le to samajhta nahin jis ko koi

rasm-e-KHat ajnabi jis ka wo ibarat hun main

jis ki buniyaad hai KHasta wo imarat hun main

makDiyon ne mere atraf bune hain jale

ye hain jale mere samjhe hue dekhe-bhaale

chandni meri hai aur na hi sitare mere

meri kashti hai na dhaare na kinare mere

mere mathe pe tabassum ki shikan bhi hogi

us ke pichhe kai rishton ki thakan bhi hogi

main pahunch jaunga ek roz zamin ke niche

KHak hi hogi phir is KHak-nashin ke niche

gard jam jaegi ek roz meri turbat par

phir to main ro bhi na paunga teri harakat par

zehn mauf hai aur dil abhi shaq hai mera

tujh pe ai umr-e-rawan thoDa to haq hai mera

ai meri ruh ke malik ye muqaddar kar de

main gham-e-zist ka mara mujhe patthar kar de

ya hisab-e-kam-o-besh aaj barabar kar de

ya meri ruh mere jism se bahar kar de