histrionic personality disorder

ye maiñ ne dekhā thā chhuTpane meñ

ki jin kā qad hai baḌā unheñ sab

salām karte

baḌe va chhoTe sabhī kī āñkhoñ

meñ dikhtī un ke liye bas izzat

to maiñ ne Thānā maiñ apnā qad bhī baḌā karūñgā

so ye huā bhī

ham-umr bachchoñ se maiñ hamesha

baḌā hī Thahrā

jin se qad meñ thā maiñ barābar

thā un se chhoTā

so khelne ko thā mere hisse meñ tanhā konā

magar mujhe thā abhī bhī baḌhnā

jahān-bhar se thā ūñchā banñā

koī bhī pahuñche na mere qad tak

ye chaah thī ab junūñ kī had tak

so ye huā bhī

har ek ehsās ab thā chhoTā

har ek rishta thā ghuTnoñ hī tak

so maiñ jo rotā hatāsh hotā

koī gale se lagātā mujh ko

thā ġhair-mumkin

baḌhā baḌhā ke maiñ apnī zid meñ

junūñ kā qad yuuñ baḌhā chukā huuñ

mire barābar koī bhī chādar bachī nahīñ hai

sukūñ ke bistar se paañv mere laTak rahe haiñ

magar maiñ ab bhī uchak uchak ke

ye dekhtā huuñ

maiñ pā ke sab kuchh yā sab gañvā ke

abhī bhī ḳhvāboñ ke kāñdhe tak hī

pahuñch sakā huuñ

ye main ne dekha tha chhuTpane mein

ki jin ka qad hai baDa unhen sab

salam karte

baDe wa chhoTe sabhi ki aankhon

mein dikhti un ke liye bas izzat

to main ne Thana main apna qad bhi baDa karunga

so ye hua bhi

ham-umr bachchon se main hamesha

baDa hi Thahra

jin se qad mein tha main barabar

tha un se chhoTa

so khelne ko tha mere hisse mein tanha kona

magar mujhe tha abhi bhi baDhna

jahan-bhar se tha uncha banna

koi bhi pahunche na mere qad tak

ye chah thi ab junun ki had tak

so ye hua bhi

har ek ehsas ab tha chhoTa

har ek rishta tha ghuTnon hi tak

so main jo rota hatash hota

koi gale se lagata mujh ko

tha ghair-mumkin

baDha baDha ke main apni zid mein

junun ka qad yun baDha chuka hun

mere barabar koi bhi chadar bachi nahin hai

sukun ke bistar se panw mere laTak rahe hain

magar main ab bhi uchak uchak ke

ye dekhta hun

main pa ke sab kuchh ya sab ganwa ke

abhi bhi KHwabon ke kandhe tak hi

pahunch saka hun