holi

milne kā tire rakhte haiñ ham dhyān idhar dekh

bhātī hai bahut ham ko tirī aan idhar dekh

ham chāhne vaale haiñ tire jaan idhar dekh

holī hai sanam hans ke tū ik aan idhar dekh

ai rañg-bhare nau-gul-e-ḳhandāñ idhar dekh

ham dekhne terā ye jamāl is ghaḌī ai jaañ

aa.e haiñ yahī karke ḳhayāl is ghaḌī ai jaañ

tū dil meñ na rakh ham se malāl is ghaḌī ai jaañ

mukhḌe pe tire dekh gulāl is ghaḌī ai jaañ

holī bhī yahī kahtī hai ai jaan idhar dekh

ab zard ye cherā jo tire sar pe jamā hai

aur is pe ye turra jo zarī kā bhī dharā hai

niimā bhī tirā rañg se kesar ke bharā hai

poshāk pe terī gul-e-sad-barg fidā hai

nargis tirī āñkhoñ pe hai qurbān idhar dekh

holī kī tarab hai jo har ik jā meñ numūdār

sunte haiñ kahīñ raag kahīñ mai se haiñ sarshār

hai dil meñ hameñ to tirī nazroñ se sarokār

pichkārī hamāre tū lagā yā na lagā yaar

ham ko to faqat hai yahī armān idhar dekh

hai dhuum se holī kī kahīñ shor kahīñ ġhul

hotā nahīñ kuchh rañg chhiḌakne meñ ta.ammul

daf bajte haiñ sab hañste haiñ aur dhuum hai bilkul

holī kī ḳhushī meñ to na kar ham se taġhāful

ai jaan hamārā bhī kahā maan idhar dekh

hai diid kī har aan talab dil ko hamāre

jiite haiñ faqat terī nigāhoñ ke sahāre

haiñ yaañ jo khaḌe aan ke is shauq ke maare

ham ek nigah ke tire mushtāq haiñ pyāre

Tuk pyaar kī nazroñ se mirī jaan idhar dekh

har chaar taraf holī kī dhūmeñ haiñ ahā hā

dekho jidhar aatā hai nazar roz tamāshā

har aan jhamaktā hai ajab aish kā charchā

holī ko 'nazīr' ab tū khaḌā dekhe hai yaañ kyā

mahbūb ye aayā are nādān idhar dekh

milne ka tere rakhte hain hum dhyan idhar dekh

bhati hai bahut hum ko teri aan idhar dekh

hum chahne wale hain tere jaan idhar dekh

holi hai sanam hans ke tu ek aan idhar dekh

ai rang-bhare nau-gul-e-KHandan idhar dekh

hum dekhne tera ye jamal is ghaDi ai jaan

aae hain yahi karke KHayal is ghaDi ai jaan

tu dil mein na rakh hum se malal is ghaDi ai jaan

mukhDe pe tere dekh gulal is ghaDi ai jaan

holi bhi yahi kahti hai ai jaan idhar dekh

ab zard ye chera jo tere sar pe jama hai

aur is pe ye turra jo zari ka bhi dhara hai

nima bhi tera rang se kesar ke bhara hai

poshak pe teri gul-e-sad-barg fida hai

nargis teri aankhon pe hai qurban idhar dekh

holi ki tarab hai jo har ek ja mein numudar

sunte hain kahin rag kahin mai se hain sarshaar

hai dil mein hamein to teri nazron se sarokar

pichkari hamare tu laga ya na laga yar

hum ko to faqat hai yahi arman idhar dekh

hai dhum se holi ki kahin shor kahin ghul

hota nahin kuchh rang chhiDakne mein tammul

daf bajte hain sab hanste hain aur dhum hai bilkul

holi ki KHushi mein to na kar hum se taghaful

ai jaan hamara bhi kaha man idhar dekh

hai did ki har aan talab dil ko hamare

jite hain faqat teri nigahon ke sahaare

hain yan jo khaDe aan ke is shauq ke mare

hum ek nigah ke tere mushtaq hain pyare

Tuk pyar ki nazron se meri jaan idhar dekh

har chaar taraf holi ki dhumen hain aha ha

dekho jidhar aata hai nazar roz tamasha

har aan jhamakta hai ajab aish ka charcha

holi ko 'nazir' ab tu khaDa dekhe hai yan kya

mahbub ye aaya are nadan idhar dekh