honT khulte nahin

un ko mujh se gila mujh ko un se gila vo bhī ḳhāmosh haiñ maiñ bhī ḳhāmosh huuñ

ḳhāmushī ban ga.ī hāsil-e-mudda.ā vo bhī ḳhāmosh haiñ maiñ bhī ḳhāmosh huuñ

kashmakash meñ haiñ maġhrūr ra.anā.iyāñ be-amāñ phirtī haiñ kitnī parchhā.iyāñ

biite lamhoñ kā ā.īna dhuñdlā gayā vo bhī ḳhāmosh haiñ maiñ bhī ḳhāmosh huuñ

koī afsāna kahtī nahīñ zindagī dhaḌkaneñ dil kī haiñ ajnabī ajnabī

barbat-e-ārzū ho gayā be-sadā vo bhī ḳhāmosh haiñ maiñ bhī ḳhāmosh huuñ

sard hai ātishīñ valvaloñ kī jabīñ dil dhaḌakte haiñ aur aañkh uThtī nahīñ

kaun batlā.e kis se huī hai ḳhatā vo bhī ḳhāmosh haiñ maiñ bhī ḳhāmosh huuñ

hosh kis ko ki dohrā.e rūdād-e-ġham rūThī rūThī sī hai lazzat-e-kaif-o-kam

khoyā khoyā sā hai e'timād-e-vafā vo bhī ḳhāmosh haiñ maiñ bhī ḳhāmosh huuñ

talḳhī-e-shauq ke daaġh dhulte nahīñ jī machaltā hai aur hoñT khulte nahīñ

kitnī bebas hai ehsās kī har adā vo bhī ḳhāmosh haiñ maiñ bhī ḳhāmosh huuñ

kaise ye pech-o-ḳham aa paḌe nā-gahāñ ham-safar ham-safar se huā bad-gumāñ

gum añdheroñ meñ hone lagā rāsta vo bhī ḳhāmosh haiñ maiñ bhī ḳhāmosh huuñ

vajah-e-āzurdagī tā-ba-lab aa.e kyā ek pindār hai kitnā sabr-āzmā

pyaar ko mil gayā ik nayā mashġhala vo bhī ḳhāmosh haiñ maiñ bhī ḳhāmosh huuñ

hurmat ik dard kī ḳham-ba-ḳham rahguzar kar rahī hai ishāre ki aao idhar

kaun manzil kā kis ko batā.e pata vo bhī ḳhāmosh haiñ maiñ bhī ḳhāmosh huuñ

un ko mujh se gila mujh ko un se gila wo bhi KHamosh hain main bhi KHamosh hun

KHamushi ban gai hasil-e-muddaa wo bhi KHamosh hain main bhi KHamosh hun

kashmakash mein hain maghrur ranaiyan be-aman phirti hain kitni parchhaiyan

bite lamhon ka aaina dhundla gaya wo bhi KHamosh hain main bhi KHamosh hun

koi afsana kahti nahin zindagi dhaDkanen dil ki hain ajnabi ajnabi

barbat-e-arzu ho gaya be-sada wo bhi KHamosh hain main bhi KHamosh hun

sard hai aatishin walwalon ki jabin dil dhaDakte hain aur aankh uThti nahin

kaun batlae kis se hui hai KHata wo bhi KHamosh hain main bhi KHamosh hun

hosh kis ko ki dohrae rudad-e-gham ruThi ruThi si hai lazzat-e-kaif-o-kam

khoya khoya sa hai e'timad-e-wafa wo bhi KHamosh hain main bhi KHamosh hun

talKHi-e-shauq ke dagh dhulte nahin ji machalta hai aur honT khulte nahin

kitni bebas hai ehsas ki har ada wo bhi KHamosh hain main bhi KHamosh hun

kaise ye pech-o-KHam aa paDe na-gahan ham-safar ham-safar se hua bad-guman

gum andheron mein hone laga rasta wo bhi KHamosh hain main bhi KHamosh hun

wajah-e-azurdagi ta-ba-lab aae kya ek pindar hai kitna sabr-azma

pyar ko mil gaya ek naya mashghala wo bhi KHamosh hain main bhi KHamosh hun

hurmat ek dard ki KHam-ba-KHam rahguzar kar rahi hai ishaare ki aao idhar

kaun manzil ka kis ko batae pata wo bhi KHamosh hain main bhi KHamosh hun