hua hai dil ka taqaza

huā hai dil kā taqāzā ki ek na.at kahūñ

maiñ apne zaḳhm ke gulshan se taaza phuul chunūñ

phir un pe shabnam-e-ashk-e-sahar-gahī chhiḌkūñ

phir un se sheroñ kī laḌiyāñ piro ke nazr karūñ

maiñ ek na.at kahūñ sochtā huuñ kaise kahūñ

maiñ terah sadiyoñ kī duurī pe huuñ khaḌā hairāñ

ye ek TuuTā huā dil ye dīda-e-giryāñ

ye munfa.il se irāde ye muzmahil īmāñ

ye apnī nisbat-e-ālī ye qismat-e-vāzhūñ

maiñ ek na.at kahūñ sochtā huuñ kaise kahūñ

ye tere ishq ke da.ave ye jazba-e-bīmār

ye apnī garmī-e-guftār dastī-e-kirdār

ravāñ zabānoñ pe ash.ār kho ga.ī talvār

hasīn lafzoñ kā ambār uḌ gayā mazmūñ

maiñ ek na.at kahūñ sochtā huuñ kaise kahūñ

pahan ke taaj bhī ġhairoñ ke ham ġhulām rahe

falak pe uḌ ke bhī shāhīn asīr-e-dām rahe

bane the saaqī magar phir shikasta jaam rahe

na kārsāz ḳhirad hai na hashr-ḳhez junūñ

maiñ ek na.at kahūñ sochtā huuñ kaise kahūñ

yahāñ kahāñ se mujhe rif.at-e-ḳhayāl mile

kahāñ se sher ko iḳhlās kā jamāl mile

kahāñ se qaal ko gum-gashta rang-e-hāl mile

huzūr ek hī misrā ye ho sakā mauzūñ

maiñ ek na.at kahūñ sochtā huuñ kaise kahūñ

hua hai dil ka taqaza ki ek nat kahun

main apne zaKHm ke gulshan se taza phul chunun

phir un pe shabnam-e-ashk-e-sahar-gahi chhiDkun

phir un se sheron ki laDiyan piro ke nazr karun

main ek nat kahun sochta hun kaise kahun

main terah sadiyon ki duri pe hun khaDa hairan

ye ek TuTa hua dil ye dida-e-giryan

ye munfail se irade ye muzmahil iman

ye apni nisbat-e-ali ye qismat-e-wazhun

main ek nat kahun sochta hun kaise kahun

ye tere ishq ke dawe ye jazba-e-bimar

ye apni garmi-e-guftar dasti-e-kirdar

rawan zabanon pe ashaar kho gai talwar

hasin lafzon ka ambar uD gaya mazmun

main ek nat kahun sochta hun kaise kahun

pahan ke taj bhi ghairon ke hum ghulam rahe

falak pe uD ke bhi shahin asir-e-dam rahe

bane the saqi magar phir shikasta jam rahe

na karsaz KHirad hai na hashr-KHez junun

main ek nat kahun sochta hun kaise kahun

yahan kahan se mujhe rifat-e-KHayal mile

kahan se sher ko iKHlas ka jamal mile

kahan se qal ko gum-gashta rang-e-haal mile

huzur ek hi misra ye ho saka mauzun

main ek nat kahun sochta hun kaise kahun