hubb-e-watan

ai āftāb-e-hubb-e-vatan tū kidhar hai aaj

tū hai kidhar ki kuchh nahīñ aatā nazar hai aaj

tujh bin jahāñ hai āñkhoñ meñ andher ho rahā

aur intizām-e-dil hai zabar zer ho rahā

ThanDe haiñ kyuuñ diloñ meñ tire josh ho ga.e

kyuuñ sab tire charāġh haiñ ḳhāmosh ho ga.e

hubb-e-vatan kī jins kā hai qaht-sāl kyuuñ

hairāñ huuñ āj-kal hai paḌā us kā kaal kyuuñ

kuchh ho gayā zamāna kā ulTā chalan yahāñ

hubb-e-vatan ke badle hai buġhz-e-vatan yahāñ

bin tere mulk-e-hind ke ghar be-charāġh haiñ

jalte evaz charāġhoñ ke sīnoñ meñ daaġh haiñ

kab tak shab-e-siyāh meñ aalam tabāh ho

ai āftāb idhar bhī karam kī nigāh ho

aalam se tā ki tīra-dilī duur ho tamām

aur hind tere nuur se ma.amūr ho mudām

ulfat se garm sab ke dil-e-sard hoñ baham

aur jo ki ham-vatan hoñ vo hamdard hoñ baham

tā ho vatan meñ apne zar-o-māl kā vafūr

aur mumlikat meñ daulat-o-iqbāl kā vafūr

sab apne hākimoñ ke liye jāñ-nisār huuñ

aur gardan-e-harīf pe ḳhanjar kī dhaar hoñ

ilm-o-hunar se ḳhalq ko raunaq diyā kareñ

aur anjuman meñ baiTh ke jalse kiyā kareñ

labrez-e-josh-e-hubb-e-vatan sab ke jaam hoñ

sarshār-e-zauq-o-shauq dil-e-ḳhās-o-ām hoñ

ai aaftab-e-hubb-e-watan tu kidhar hai aaj

tu hai kidhar ki kuchh nahin aata nazar hai aaj

tujh bin jahan hai aankhon mein andher ho raha

aur intizam-e-dil hai zabar zer ho raha

ThanDe hain kyun dilon mein tere josh ho gae

kyun sab tere charagh hain KHamosh ho gae

hubb-e-watan ki jins ka hai qaht-sal kyun

hairan hun aaj-kal hai paDa us ka kal kyun

kuchh ho gaya zamana ka ulTa chalan yahan

hubb-e-watan ke badle hai bughz-e-watan yahan

bin tere mulk-e-hind ke ghar be-charagh hain

jalte ewaz charaghon ke sinon mein dagh hain

kab tak shab-e-siyah mein aalam tabah ho

ai aaftab idhar bhi karam ki nigah ho

aalam se ta ki tira-dili dur ho tamam

aur hind tere nur se mamur ho mudam

ulfat se garm sab ke dil-e-sard hon baham

aur jo ki ham-watan hon wo hamdard hon baham

ta ho watan mein apne zar-o-mal ka wafur

aur mumlikat mein daulat-o-iqbaal ka wafur

sab apne hakimon ke liye jaan-nisar hun

aur gardan-e-harif pe KHanjar ki dhaar hon

ilm-o-hunar se KHalq ko raunaq diya karen

aur anjuman mein baiTh ke jalse kiya karen

labrez-e-josh-e-hubb-e-watan sab ke jam hon

sarshaar-e-zauq-o-shauq dil-e-KHas-o-am hon