hubb-e-watan

jo sāhib-e-fan mulk ko kartā nahīñ bedār

madqūq hai fan us kā vo fankār hai bekār

ai ahl-e-suḳhan mulk kā bhī aap pe haq hai

maanā ki dil-āvez haiñ gesū-o-lab-e-yār

lenā hai jo ab kaam shakar-rez qalam se

tausīf-e-ḳham-e-abru-e-jānāñ se hai dushvār

har samt se yalġhār-e-havādis hai vatan par

ham apnī hī aġhrāz meñ lekin haiñ giraftār

ġhairat kā taqāzā hai ki sar un ke kuchal deñ

rakhte haiñ nazar mulk kī sarhad pe jo aġhyār

is vaqt bhī jo kaam na aa.egā vatan ke

ġhaddār hai mardūd hai vo mard-e-siyahkār

dushman ke jo hāthoñ meñ vatan bechnā chāheñ

aise bhī haiñ maujūd vatan meñ ka.ī ġhaddār

ham logoñ ko aapas meñ laḌāte haiñ jo paiham

lāzim hai ki ham log raheñ un se ḳhabar-dār

marte haiñ jo ab naam pe maz.hab ke zabāñ ke

behtar hai ki vo mulk pe marne ko hoñ tayyār

ik vo haiñ jo karte haiñ mah-o-mehr ko tasḳhīr

ik ham haiñ ki rahte haiñ faqat barsar-e-paikār

ta.amīr kā ab in se nikāleñ koī pahlū

taḳhrīb ke go ham ko nazar aate haiñ āsār

ham azmat-e-aslāf ko kyoñ bhuul ga.e haiñ

ham meñ na vo ġhairat na hamiyyat na vo īsār

maġhrib ko bhī miltā thā kabhī faiz yahāñ se

bhārat thā zamāne meñ kabhī matla-e-anvār

aa.egī bahār apne ḳhizāñ-dīda vatan meñ

bigḌe hue hālāt se ai dil na ho bezār

mauzū-e-suḳhan hubb-e-vatan ham ne banāyā

kuchh ġham nahīñ is jins ke kam haiñ jo ḳharīdār

kirdār pe mauqūf hai qaumoñ kī taraqqī

kartā hai 'bahār' aaj tumheñ mahram-e-asrār

jo sahib-e-fan mulk ko karta nahin bedar

madquq hai fan us ka wo fankar hai bekar

ai ahl-e-suKHan mulk ka bhi aap pe haq hai

mana ki dil-awez hain gesu-o-lab-e-yar

lena hai jo ab kaam shakar-rez qalam se

tausif-e-KHam-e-abru-e-jaanan se hai dushwar

har samt se yalghaar-e-hawadis hai watan par

hum apni hi aghraaz mein lekin hain giraftar

ghairat ka taqaza hai ki sar un ke kuchal den

rakhte hain nazar mulk ki sarhad pe jo aghyar

is waqt bhi jo kaam na aaega watan ke

ghaddar hai mardud hai wo mard-e-siyahkar

dushman ke jo hathon mein watan bechna chahen

aise bhi hain maujud watan mein kai ghaddar

hum logon ko aapas mein laDate hain jo paiham

lazim hai ki hum log rahen un se KHabar-dar

marte hain jo ab nam pe mazhab ke zaban ke

behtar hai ki wo mulk pe marne ko hon tayyar

ek wo hain jo karte hain mah-o-mehr ko tasKHir

ek hum hain ki rahte hain faqat barsar-e-paikar

tamir ka ab in se nikalen koi pahlu

taKHrib ke go hum ko nazar aate hain aasar

hum azmat-e-aslaf ko kyon bhul gae hain

hum mein na wo ghairat na hamiyyat na wo isar

maghrib ko bhi milta tha kabhi faiz yahan se

bhaarat tha zamane mein kabhi matla-e-anwar

aaegi bahaar apne KHizan-dida watan mein

bigDe hue haalat se ai dil na ho bezar

mauzu-e-suKHan hubb-e-watan hum ne banaya

kuchh gham nahin is jins ke kam hain jo KHaridar

kirdar pe mauquf hai qaumon ki taraqqi

karta hai 'bahaar' aaj tumhein mahram-e-asrar