hujum haT nahin raha

hujūm jis kī Thokaroñ kī zarb se

havā meñ hāñptā huā ġhubār chhaT nahīñ rahā

ġhubār meñ jo ḳhaak hai zamīn se uḌī hai yā

kisī ke sard jism se ḳhabar nahīñ

ḳhabar bhī ho to kyā bigāḌ le koī

hujūm haT nahīñ rahā

abad kī shāḳh-e-sabz par khilā huā

shabāb kā gulāb pattiyoñ meñ baT nahīñ rahā

hujūm be-sukūn hai savāl mar nahīñ rahā

savāl kā zabān se juḌā huā jo taar hai

vo taar kaT nahīñ rahā

hujūm haT nahīñ rahā

vo mar gayā

hujūm us kī maañ kī bad-du'ā se Dar nahīñ rahā

hujūm use chaTaḳhtī pasliyoñ ke bal ghasīTtā chalā gayā

kisī ne us ke zaḳhm ko luaab kā kafan diyā

koī badan ko lāThiyoñ se pīTtā chalā gayā

qarīb chand log 'aks-band kar rahe haiñ

cameroñ meñ aise khel ko

ki jis meñ sab khilāḌiyoñ kī āstīñ pe ḳhuun hai

hujūm ko junūn hai hujūm haT nahīñ rahā

maiñ muntazir huuñ ik taraf

mire aqab meñ chup khaḌī hai ik muhāfizoñ kī saf

hujūm haT nahīñ rahā

hujūm se kaho haTe ġhubār jaane kab chhaTe

maiñ us ke dard se bhiñche shikasta haath kī giraft se

zarā sī nazm khīñch luuñ

muhāfizoñ kā tarjumāñ du'ā-e-ḳhair meñ magan

nahīñ nahīñ vo pahle se raTā huā bayān raT nahīñ rahā

mashāl ḳhaan ḳhair ho

tamāshā-gāh se to rā.egāñ palaT nahīñ rahā

hujūm haT nahīñ rahā

hujum jis ki Thokaron ki zarb se

hawa mein hanpta hua ghubar chhaT nahin raha

ghubar mein jo KHak hai zamin se uDi hai ya

kisi ke sard jism se KHabar nahin

KHabar bhi ho to kya bigaD le koi

hujum haT nahin raha

abad ki shaKH-e-sabz par khila hua

shabab ka gulab pattiyon mein baT nahin raha

hujum be-sukun hai sawal mar nahin raha

sawal ka zaban se juDa hua jo tar hai

wo tar kaT nahin raha

hujum haT nahin raha

wo mar gaya

hujum us ki man ki bad-du'a se Dar nahin raha

hujum use chaTaKHti pasliyon ke bal ghasiTta chala gaya

kisi ne us ke zaKHm ko luab ka kafan diya

koi badan ko laThiyon se piTta chala gaya

qarib chand log 'aks-band kar rahe hain

cameron mein aise khel ko

ki jis mein sab khilaDiyon ki aastin pe KHun hai

hujum ko junun hai hujum haT nahin raha

main muntazir hun ek taraf

mere aqab mein chup khaDi hai ek muhafizon ki saf

hujum haT nahin raha

hujum se kaho haTe ghubar jaane kab chhaTe

main us ke dard se bhinche shikasta hath ki giraft se

zara si nazm khinch lun

muhafizon ka tarjuman du'a-e-KHair mein magan

nahin nahin wo pahle se raTa hua bayan raT nahin raha

mashaal KHan KHair ho

tamasha-gah se to raegan palaT nahin raha

hujum haT nahin raha